Pisalema 89 - BIBELE Mahungu Lamanene

Ntwanano wa Xikwembu na Davhida

Swiletelo swa Etani wa ka Ezra.

¹ We HOSI, ndzi ta yimbelela rirhandzu ra wena hilaha ku nga heriki, minkarhi hinkwayo ndzi ta byela vanhu leswaku wa tshembeka.

² Mina ndzi ri: Rirhandzu ra wena ri ta va kona hilaha ku nga heriki, ku tshembeka ka wena ku tiyile kukota matilo.

³ Wena u vurile u ku: “Ndzi endlile ntwanano ni muhlawuriwa wanga. Emahlweni ka Davhida nandza wa mina ndzi tibohile hi ku hlambanya ndzi ku:

⁴ ‘Vatukulu va wena va ta fuma hilaha ku nga heriki, ndzi ta tiyisa vuhosi bya wena minkarhi hinkwayo.’ ”

⁵ We HOSI, matilo a ma dzunise mintirho ya wena leyo hlamarisa, a ku twarisiwe ku tshembeka ka wena etihubyeni ta le tilweni.

⁶ Xana ku na mani le henhla la ringanaka na wena xana? Exikarhi ka swivumbiwa swa le tilweni, i mani la fanaka na wena ke?

⁷ Hakunene we Xikwembu, wa chaviseka swinene ehubyeni ya vahlawuriwa va le henhla, wa xiximeka ku tlula hinkwavo lava va ku rhendzeleke.

⁸ We HOSI Xikwembu xa matimba hinkwawo, xana i mani la fanaka na wena xana? Ntamu ni ku tshembeka swi ku rhendzerile we HOSI.

⁹ Hi wena la fumaka lwandle loko ri vila, loko magandlati ya rona ma tlakuka, wa ma miyeta.

¹⁰ U dlayile Rahaba nyoka ya le lwandle, u yi phyandlasa; u hangalasile valala va wena hi ntamu wa wena lowukulu.

¹¹ Tilo ni misava i swa wena, hinkwaswo leswi nga ka swona swi sunguriwile hi wena.

¹² Hi wena u tumbuluxeke dzonga ni n'walungu, tintshava ta Taboro na Hermoni ti ba minkulungwana, ti dzunisa vito ra wena.

¹³ U ni matimba ya tinhenha; loko u tlakusa voko ra wena ra xinene, ntamu wa wena wa vonaka.

¹⁴ Masungulo ya vuhosi bya wena i nawu ni ku lulama, rirhandzu ni ku tshembeka i malandza ya wena.

¹⁵ We HOSI, ku katekile tiko ra vanhu lava tivaka ku ku bela nkulungwana, va nga lava amukelekaka eka wena, lava hanyaka eku vonakaleni.

¹⁶ Masiku hinkwawo va le ku tsakeni hikwalaho ka wena, va tiya nhlana, hikuva wa va lwela.

¹⁷ Hakunene we HOSI, wa hi tiyisa hi ndlela yo hlamarisa, hosi ya tiko ra hina ya dzuneka, hikuva wa yi tsakela.

¹⁸ Mufumi wa hina, a nga loyi a hi sirhelelaka, ú le mavokweni ya wena we HOSI Muhlawuleki wa Israele.

¹⁹ Siku rin'wana u vulavurile na hina malandza ya wena hi xivono, u ku: “Ndzi nyikile nhenha yin'wana entamu lowukulu; ndzi yi hlawurile exikarhi ka vanhu va tiko, ndzi yi tlakusa.

²⁰ Ndzi tihlawulele Davhida leswaku a va nandza wa mina, ndzi n'wi cherile mafurha ya mina layo hlawuleka enhlokweni.

²¹ Kutani ndzi ta va na yena ndzi n'wi seketela, ndzi n'wi tiyisa hi ntamu wa mina.

²² Valala va yena va nge koti ku n'wi juma, lavo homboloka va nge n'wi wiseli ehansi.

²³ Ndzi ta yayarhela valala va yena a ri karhi a swi vona, ndzi ba lava va n'wi vengaka.

²⁴ Ku tshembeka ka mina ni rirhandzu ra mina swi ta n'wi seketela; loko a twa vito ra mina u ta tiya nhlana.

²⁵ Ndzi ta navisa mfumo wa yena wu ya fika elwandle, ndzi ta wu perisa ni milambu.

²⁶ Yena ú ta ku ka mina: ‘U tata wa mina ni Xikwembu xanga, khokholo leri ndzi tumbelaka eka rona!’

²⁷ Ndzi ta n'wi endla mativula ya mina, tihosi hinkwato ta misava ti ta va hansi ka yena.

²⁸ Rirhandzu ra mina ri ta n'wi hlayisa minkarhi hinkwayo, ntwanano wa mina na yena wu nga ka wu nga heli.

²⁹ Mfumo wa yena wu ta tiya kukota matilo, vuhosi a byi nga suki endyangwini wa ka vona.

³⁰ “Loko vana va yena va tlula milawu ya mina va nga landzeleli swiletelo swa mina,

³¹ loko va tshika swileriso swa mina va nga endli ku rhandza ka mina,

³² ndzi ta va ba hi mintungu, ndzi va bela swidyoho swa vona ni milandzu ya vona.

³³ “Hambiswiritano, rirhandzu leri ndzi n'wi rhandzaka ha rona a ri nga heli, ndza ha ta tshembeka eka yena.

³⁴ Ntwanano wa mina na yena a ndzi nga wu tshovi, ni marito lama humeke enon'weni wa mina a ndzi nga ma hundzuluxi.

³⁵ Ndzi hlambanyile khale hi vito ra mina lero hlawuleka leswaku Davhida ndzi nga ka ndzi nga n'wi hembeli.

³⁶ Va ka vona va ta fuma hilaha ku nga heriki, vuhosi bya yena byi ta va kona minkarhi hinkwayo kukotisa dyambu.

³⁷ Minkarhi hinkwayo ú ta yima a tiyile a kota n'weti, yona mbhoni yo tshembeka ya le henhla etilweni.”

³⁸ Kambe sweswi we HOSI, u hlundzukerile muhlawuriwa wa wena, u n'wi tsan'wile u n'wi cukumeta.

³⁹ U tshovile ntwanano lowu u wu endleke ni nandza wa wena, xidlodlo xa yena xa vuhosi u xi hoxile endzhopeni.

⁴⁰ U wisile rirhangu hinkwaro ra muti wa yena, makhokholo ya kona u ma endlile marhumbi.

⁴¹ Vahundzi va ndlela hinkwavo va phangha swilo swa yena, kutani ú hundzukile xihlekiso eka vaakelani va yena.

⁴² U katekisile valala va yena, u va tsakisa hinkwavo.

⁴³ U bvinyile matlhari ya yena, u n'wi hlurisa hi valala.

⁴⁴ U n'wi tekele nhonga ya vuhosi, kutani u wisa xiluvelo xa yena.

⁴⁵ Masiku ya vuntshwa bya yena u ma hungutile, u n'wi funengeta hi tingana.

⁴⁶ We HOSI, xana u ta fihla mombo wa wena hilaha ku nga heriki xana? Xana vukari bya wena byi ta pfurha ku fika rini xana?

⁴⁷ We N'wini wanga, ndzi anakanye, hikuva vutomi bya mina byi komile ngopfu; vanhu hinkwavo lava u va tumbuluxeke, a hi nchumu!

⁴⁸ Xana hi wihi munhu loyi a nga ta hanya a nga fi xana? I mani loyi a nga ponaka ematimbeni ya xivandla xa vafi xana?

⁴⁹ We N'wini wanga, xana rirhandzu ra wena leri a wu ri na rona khale, ri nga leri u ri tshembiseke Davhida nandza wa wena, ri kwihi xana?

⁵⁰ Anakanya hilaha mina nandza wa wena ndzi rhuketeriwaka hakona, tsundzuka ndlela leyi vamatiko va ndzi sandzaka ha yona.

⁵¹ We HOSI, valala va wena va hlekula ni ku monya mintirho ya munhu loyi u n'wi hlawuleke.

⁵² HOSI Xikwembu a xi nkhensiwe hilaha ku nga heriki! Amen! Amen!