Pisalema 88 - BIBELE Mahungu Lamanene

Xikhongelo xa munhu loyi a xanisekaka

Pisalema ya va ka Kore. Risimu ra Muyimbelerisi, leri hlaveleriwaka hi tinanga. Swiletelo swa Hemani wa ka Ezra.

¹ We HOSI, Xikwembu xanga ni muponisi wanga, vusiku ni nhlekanhi ndzi huwelela ka wena ndzi kombela ku pfuniwa.

² Amukela xikhongelo xa mina, u ndzi yingisa loko ndzi huwelela.

³ Makhombo ma ndzi talele ngopfu, ndzo vona sirha ri ahlamile emahlweni ka mina.

⁴ Ndzi hlayiwa exikarhi ka lava yaka exivandleni xa vafi, a ndza ha ri na matimba niswitsanana.

⁵ Ndzi cukumetiwile exikarhi ka vafi, ndzi fana ni lava dlayiweke va hoxiwa esirheni, lava ni ku va anakanya u nga ha va anakanyiki, hikuva va susiwile emavokweni ya wena.

⁶ U ndzi wisele ekheleni leri enteke, endhawini ya xinyami lexikulu.

⁷ Vukari bya wena bya ndzi tshikelela, magandlati ya wena hinkwawo ma ndzi khubumetile.

⁸ U ndzi hambanisile ni tintangha ta mina, hikuva u ndzi hundzurile xilo xa manyala eka vona. Ndzi pfaleriwile laha ndzi tsandzekaka ku baleka.

⁹ Mahlo ya mina ma fehla hikuva ndzi le ku rileni. We HOSI, masiku hinkwawo ndza ku khongela, ndzi tlakusile mavoko.

¹⁰ Xana mahlori ya wena u ta ma komba vafi xana? Lava nga masirheni va nga pfuka va ku dzunisa xana?

¹¹ Xana esirheni ka ha vulavuriwa hi rirhandzu ra wena xana? Lava nga xivandleni xa vafi va nga ha vulavula hi ku tshembeka ka wena xana?

¹² Xana mintirho ya wena leyo hlamarisa ya ku hi lwela, yi tiviwa hi mani exinyamini xa rifu, etikweni ra lava rivariweke, xana?

¹³ Kambe mina ndzi huwelela eka wena we HOSI, xikhongelo xa mina xi ta eka wena ka ha ri mixo.

¹⁴ We HOSI, u ndzi cukumetela yini xana, hikwalaho ka yini u ndzi fularhela xana?

¹⁵ Ndzi tsongahatiwile ku sukela evuntshweni bya mina, ndzi pona ri ahlamile; leswi u ndzi bisaka swona swa chavisa, swi ndzi heta ntamu.

¹⁶ Vukari bya wena byi le henhla ka mina, ndlela leyi u ndzi hlaselaka ha yona ya ndzi vavisa.

¹⁷ Maxangu lawa ma ndzi rhendzela siku hinkwaro ku fana ni ndhambi, ma ndzi tela ma ta ndzi khubumeta.

¹⁸ U ndzi hambanisile ni vanghana kumbe vaakelani va mina, kutani sweswi ntangha ya mina i xivandla xa vafi!