Pisalema 87 - BIBELE Mahungu Lamanene

Muti wa Siyoni i ntsindza eka vanhu va matiko hinkwawo

Pisalema ya va ka Kore. Risimu.

¹ HOSI Xikwembu xi simekile muti wa Siyoni entshaveni leyo hlawuleka,

² xi rhandza muti lowu ni tinyangwa ta wona ku tlula miti leyin'wana ya va ka Yakobo.

³ Leswi vanhu va swi vulaka ehenhla ka wena we muti wa Xikwembu, a hi ku saseka ka swona!

⁴ Xikwembu xi ri: “Exikarhi ka lava va ndzi tivaka, ndzi ta katsa va le Egipta ni va le Babilona; swi ta va tano ni Vafilista ni va le Tiri ni va le Etiyopiya. Vanhu va ta ku: ‘Munhu wo karhi ú velekiwile etikweni ro karhi.’

⁵ Kambe loko wu ri muti wa Siyoni, va ta ku: ‘I kaya ra munhu un'wana ni un'wana, hikuva Xikwembu xa le henhla-henhla hi xona xi wu tiyisaka!’ ”

⁶ HOSI Xikwembu xi le ku longoloxeni ka mavito ya vanhu va matiko hinkwawo, kutani xi ri: “Na vona lava, emutini wa Siyoni hi le kaya ka vona!”

⁷ Kutani vona va cina ni ku yimbelela, va ku: “Timitsu ta hina hinkwato ti kwala ka wena!”