Pisalema 86 - BIBELE Mahungu Lamanene

Xikhongelo xo kombela ku lweriwa hi Xikwembu

Xikhongelo xa Davhida.

¹ We HOSI ndzi yingise u ndzi hlamula, hikuva ndzi xisiwana, ndza pfumala.

² Sirhelela vutomi bya mina, hikuva ndzi nandza wa wena loyi a tshembekeke; ndzi ponise, hikuva ndza ku tshemba, u Xikwembu xanga.

³ We N'wini wanga ndzi twele vusiwana, hikuva ndzi huwelela eka wena nhlekanhi hinkwawo.

⁴ We N'wini wanga, ndzi tsakise, hikuva ndzi nandza wa wena, ndzi tlakusa mahlo ndzi languta eka wena.

⁵ U ni vunene we N'wini wanga, naswona wa rivalela, hinkwavo lava va ku khongelaka wa va rhandza.

⁶ We HOSI, rhiya ndleve u yingisa xikhongelo xa mina; loko ndzi kombela ku pfuniwa, u nga ndzi miyeleli.

⁷ Siku leri ndzi welaka ekhombyeni, ndzi huwelela eka wena, hikuva u hlamula swikhongelo swa mina.

⁸ Exikarhi ka swikwembu, ku hava lexi fanaka na wena we N'wini wanga, hambi mintirho ya wena a yi pimanisiwi na yin'wana.

⁹ Vanhu hinkwavo lava u va vumbeke, va ta ku nkhinsamela we HOSI, va dzunisa vito ra wena.

¹⁰ Wena u nkulukumba, naswona u endla swilo leswo hlamarisa. Hakunene, hi wena ntsena u nga Xikwembu.

¹¹ We HOSI, ndzi dyondzise tindlela ta wena, leswaku ndzi ta famba entiyisweni; mbilu ya mina a yi lave xilo xin'we ntsena, ku nga ku xixima vito ra wena.

¹² We Xikwembu N'wini wanga, ndza ku nkhensa hi mbilu ya mina hinkwayo, ndzi ta twarisa vito ra wena hilaha ku nga heriki,

¹³ hikuva u ndzi kombile rirhandzu lerikulu, u ndzi kutsurile u ndzi humesa exivandleni xa vafi.

¹⁴ We Xikwembu, vanhu lava tikurisaka va ndzi hlasela, ntlawa wa swigevenga wu lava ku ndzi dlaya; vanhu lava a va na mhaka na wena!

¹⁵ Kambe wena N'wini wanga, u Xikwembu lexi twelaka vanhu evusiwana; wa va tsetselela, u hlwela ku kariha, u tele tintswalo ni ku tshembeka.

¹⁶ Hundzuluka u ndzi languta, u ndzi twela vusiwana; ndzi nyike matimba u ndzi ponisa, hikuva ndzi vile nandza wa wena ku sukela evuhlangini bya mina.

¹⁷ Ndzi nyike xikombiso xa leswaku wa ndzi tsakela, kutani lava va ndzi vengaka va ta khoma hi tingana loko va swi vona, hikuva wena HOSI u ta va u ndzi pfunile, u ndzi tiyisa.