Pisalema 85 - BIBELE Mahungu Lamanene

Xikhongelo xo kombela ku rhula etikweni

Risimu ra Muyimbelerisi. Pisalema ya va ka Kore.

¹ We HOSI, u vile ni tintswalo eka vanhu va wena, u vuyisile va ka Yakobo lava a va ri evukhumbini.

² U dlayile milandzu ya vanhu va wena, u va rivalela swidyoho swa vona hinkwaswo.

³ U rheletile vukari bya wena hinkwabyo, u tshika ku hlundzuka ka wena lokukulu.

⁴ We Xikwembu muponisi wa hina, hi vuyisele exiyin'weni xa hina xa khale, u nga ha tlheli u hi karihela.

⁵ Xana u ta hi hlundzukela hilaha ku nga heriki xana? Xana u ta ya emahlweni u karihela ni lava va ha taka xana?

⁶ Leswi hi nga vanhu va wena, a wu nga tlheli u hi nyika vutomi leswaku hi ta titsakela eka wena xana?

⁷ We HOSI, hi kombe rirhandzu ra wena, u tlhela u hi ponisa!

⁸ Ndzi navela ku yingisa leswi HOSI Xikwembu xi swi vulaka; marito ya xona ma tisa ku rhula eka vanhu va xona lava va xi khongelaka. Ntsena va nga ha tlheleli eswidyohweni swa vona!

⁹ Hakunene Xikwembu xi le kusuhi ni lava va xi chavaka: Xi ta va ponisa, kutani ku dzuneka ka xona a ku nga ha suki etikweni ra hina.

¹⁰ Rirhandzu ni ku tshembeka swi hlanganile, ku lulama ni ku rhula swa vukarhana.

¹¹ Ku tshembeka ku hluka ku huma emisaveni, loko ku lulama ku ri karhi ku rhelela hi le tilweni.

¹² HOSI Xikwembu hi xiviri xa xona xi nyika leswinene, kutani misava yi hi humesela mihandzu.

¹³ Ku lulama ku rhangela HOSI Xikwembu emahlweni; laha xi fambaka kona, ku pfuleka tindlela.