Pisalema 84 - BIBELE Mahungu Lamanene

Risimu ra munhu la rhandzaka ngopfu Tempele ya le Yerusalema

Risimu ra Muyimbelerisi, leri hlaveleriwaka hi mukhuva wa le Gati. Pisalema ya va ka Kore.

¹ We HOSI ya matimba hinkwawo, swi tsakisa ngopfu ku va eTempeleni ya wena;

² ndzi navela hi mbilu ya mina hinkwayo ku fika exivaveni xa yindlu ya wena. Hi miri ni moya, ndzi huwelela hi ku tsaka eka wena Xikwembu lexi hanyaka.

³ We HOSI ya matimba hinkwawo, u mufumi wa mina ni Xikwembu xanga! Hambi swi ri swindzingiri swi kuma vutshamo eTempeleni, na tona timbewulani ti aka swisaka kusuhi ni tialitari ta wena, ti akela mavondlo ya tona.

⁴ Va katekile ngopfu lava tshamaka eTempeleni ya wena, va ku dzunisa minkarhi hinkwayo.

⁵ Ku katekile vanhu lava kumaka matimba eka wena, lava khomaka ndlela yo ya eYerusalema va tsakile.

⁶ Hambiloko va hundza enkoveni lowu omeke lowu vuriwaka Nkova wa Baka, va wu kuma wu ri ni swihlovo, naswona wu katekisiwile hi timpfula leto sungula.

⁷ Loko va famba, va engeteleriwa matimba masiku hinkwawo, va ko va fika emahlweni ka wena eSiyoni, we Xikwembu.

⁸ We HOSI Xikwembu xa matimba hinkwawo, yingisa xikhongelo xa mina, rhiya ndleve we Xikwembu xa va ka Yakobo.

⁹ Languta ni xitlhangu xa hina yi nga hosi ya tiko, wena Xikwembu, u yi amukela hi tintswalo, yona muhlawuriwa wa wena.

¹⁰ Hakunene ku tshama siku rin'we ntsena eTempeleni ya wena, swi tlula ku tshama masiku ya khume ra madzana kun'wana. Ndzi ngo tsakela ku yima kunene enyangweni ya Tempele, we Xikwembu xanga, ku ri na ku tshama ni lava va nga ku khongeriki.

¹¹ HOSI Xikwembu i khokholo ni xitlhangu, xi avela vanhu tintswalo ni ku dzuneka; lava hanyaka hi ndlela leyi nkhensekaka, HOSI Xikwembu xi va nyika minkateko.

¹² We HOSI ya matimba hinkwawo, ku katekile munhu loyi a ku tshembaka.