Pisalema 82 - BIBELE Mahungu Lamanene

Xikwembu i muavanyisi wa vanhu hinkwavo

Pisalema ya Asafa.

¹ Xikwembu xi tshamile ehubyeni ya le henhla-henhla, xi avanyisa vanhu xi ri ni swivumbiwa swa le tilweni,

² xi ku: “Loko mi avanyisa timhaka, xana mi ta tshika rini ku ya hi nghohe, ni ku yimelela lava dyoheke xana?

³ Pfunani lava tsaneke ni lava pfumalaka vatswari, mi lwela tifanelo ta lava titsongahataka ni ta swisiwana.

⁴ Ponisani lava tsaneke ni vapfumari, mi va vutla emavokweni ya lavo homboloka.

⁵ “Kambe n'wina a mi na vutivi, ni ku twisisa a mi twisisi; mi gugurhuteka emunyameni, hikokwalaho masungulo ya misava hinkwayo ma tsekatseka.

⁶ “Ndzi vurile leswaku n'wina mi swikwembu, ni leswaku hinkwenu mi vana va Loyi a nge henhla-henhla.

⁷ Hambiswiritano mi ta fa kukota vanhu, vutomi bya n'wina byi ta hela ku fana ni bya hosi yihi na yihi.”

⁸ We Xikwembu, tana u ta avanyisa misava, hikuva matiko hinkwawo ma le hansi ka wena.