Pisalema 81 - BIBELE Mahungu Lamanene

Vaisraele va khongoteriwa hi Xikwembu ku yingisa

Risimu ra Muyimbelerisi, leri hlaveleriwaka hi mukhuva wa le Gati. Pisalema ya Asafa.

¹ Yimbelelani mi dzunisa Xikwembu lexi xi hi nyikaka matimba, banani minkulungwana mi tlangela Xikwembu xa va ka Yakobo.

² Sumani risimu mi ba swigubu, chayani swipendana ni tiharipa.

³ Banani mhalamhala loko n'weti wu tshama, ni loko wu ba mahlampfu esikwini ra nkhuvo wa hina.

⁴ Lexi i xiletelo eka Vaisraele, wu nga nawu lowu wu humaka eka Xikwembu xa va ka Yakobo.

⁵ Xikwembu xi wu nyikile va ka Yosefa, siku xi humeke ku ya lwa ni tiko ra Egipta. Ndzi twa rito leri ndzi nga ri tiviki leri nge:

⁶ “Ndzi mi rhurile ndzhwalo emakatleni, mavoko ya n'wina a ma ha tikeriwi hi nchumu.

⁷ Mi huwelerile eka mina mi ri emaxangwini, kutani ndzi mi lamulerile; ndzi mi hlamurile ndzi ri emapapeni lama dzindzaka, ndzi mi kamberile eswihlobyeni swa Meriba.

⁸ N'we vanhu va mina, yingisani loko ndzi mi khongotela, a ndzi ta tsaka ngopfu loko mi ndzi twa, n'wina Vaisraele!

⁹ Mi nga tshuki mi tirhela swikwembu swin'wana, mi nga nkhinsameli swikwembu swa vanhu vambe.

¹⁰ Hi mina HOSI Xikwembu xa n'wina lexi xi mi humeseke etikweni ra Egipta: kangatelani mavoko ya n'wina, ndzi ta mi phamela.

¹¹ “Kambe Vaisraele vanhu va mina a va ndzi yingisanga, a va vanga na mhaka na mina.

¹² Hikokwalaho ndzi va tshikile va tiendlela hi ku rhandza, va endla leswi tinhloko ta vona ti va byelaka swona.

¹³ A ndzi ta tsaka ngopfu loko Vaisraele vanhu va mina va ndzi yingisa, va famba etindleleni ta mina.

¹⁴ A ndzi ta hatla ndzi tlakusa voko ra mina, ndzi ba valala va vona ndzi va wisela hansi.

¹⁵ Lava va ndzi vengaka mina HOSI, a va ta nkhinsama emahlweni ka n'wina Vaisraele, va endlisa sweswo minkarhi hinkwayo.

¹⁶ Kambe n'wina a ndzi ta mi phamela vuswa bya xibasa, ni vulombe byo huma ebakweni ra maribye, mi dya byona mi xurha.”