Pisalema 80 - BIBELE Mahungu Lamanene

Xikwembu xi komberiwa ku pfuxa tiko ra Israele

Risimu ra Muyimbelerisi, leri hlaveleriwaka hi switende. Switsundzuxo swa Asafa. Pisalema.

¹ We murisi wa Israele, yingisa, rhiya ndleve wena u fambisaka va ka Yosefa kukota ntlhambi; wena u tshameke exiluvelweni ehenhla ka tikerubu, komba ku vonakala ka wena.

² Hlavutela matimba ya wena emahlweni ka va ka Efrayimi ni va ka Benjamini ni va ka Manase, tana u ta hi ponisa.

³ Tlhela u hi pfuxa we Xikwembu, u hi amukela hi tintswalo, kutani hi ta ponisiwa.

⁴ We HOSI Xikwembu xa matimba hinkwawo, xana u ta hlundzuka ku fikela rini, u ala ku yingisa swikhongelo swa hina vanhu va wena xana?

⁵ Mahlomulo i swakudya leswi u hi phamelaka swona, u hi nwisile mihloti hi xinwelo lexi khapaka.

⁶ Vaakelani va hina va lwetana hi tiko ra hina, valala va hina va le ku sandzeni.

⁷ Xikwembu xa matimba hinkwawo, tlhela u hi pfuxa, u hi amukela hi tintswalo, leswaku hi pona.

⁸ U tsuvurile murhi wa vhinya etikweni ra Egipta, u ya wu byala etikweni leri u hlongoleke vamatiko va suka eka rona.

⁹ U khulerile xivandla u wu byala eka xona, kutani wu mila timitsu, wu kula wu funengeta tiko hinkwaro.

¹⁰ Tintshava a ti ri endzhutini wa wona; a wu namarhela mirhi leyikulu ya mikedari,

¹¹ wu phaka marhavi ma fika eLwandle ra Mediteraniya, man'wana ma fika enambyeni wa Yufrata.

¹² U tshovele yini rihlampfu ra nsimu leyi ya vhinya ke? Vahundzi va ndlela hinkwavo va yiva mihandzu ya kona.

¹³ Tinguluve ta nhova ta wu kandziyela, swiharhi swa le mananga swi dya eka wona.

¹⁴ We Xikwembu xa matimba hinkwawo, ha kombela, vuya! Languta u ri etilweni, u vona leswi humelelaka; sirhelela murhi lowu wa vhinya,

¹⁵ ximila lexi u xi byaleke hi voko ra wena, a nga n'wana loyi u nga tiwundlela yena.

¹⁶ Valala va hina lava tsemeke ni ku hisa murhi lowu, va tshinye u va herisa hi vukari bya wena,

¹⁷ kambe u katekisa hosi ya tiko leyi u yi hlawuleke, leyi u yi tiyiseke hi matimba ya wena,

¹⁸ kutani hi nga ka hi nga ku fularheli; tlhela u hi nyika vutomi, kutani hina hi ta gandzela wena ntsena.

¹⁹ Tlhela u hi pfuxa, we HOSI Xikwembu xa matimba hinkwawo, u hi amukela hi tintswalo, kutani hi ta ponisiwa.