Pisalema 8 - BIBELE Mahungu Lamanene

Ku dzuneka ka Muvumbi ni vuhosi bya munhu

Risimu ra Muyimbelerisi, leri hlaveleriwaka hi mukhuva wa le Gati. Pisalema ya Davhida.

¹ We HOSI, N'wini wa hina, vito ra wena ri dzuneka ngopfu emisaveni hinkwayo! Wena u vekeke ku kwetsima ka wena ehenhla ka matilo,

² u tiendlerile rirhangu hi milomo ya tindzumulo ni ya swihlangi swa le makatleni, u vhika ha yona lava lwaka na wena, u miyeta nala ni murihiseli.

³ Loko ndzi hlalela matilo lawa tintiho ta wena ti ma vumbeke, ni n'weti, ni tinyeleti leti u ti vekeke evutshan'wini bya tona,

⁴ ndzi ri, munhu i ncini leswaku u va na mhaka na yena, yena munhu wa nyama i mani leswaku u tikarhatela yena xana?

⁵ Kambe u n'wi vumbile a va ehansinyana ka wena, u n'wi tlhandlekile harhi ya ku kwetsima ni ku twala.

⁶ U n'wi nyikile ku fuma swilo leswi mavoko ya wena ma swi vumbeke, u vekile hinkwaswo swi va hansi ka minkondzo ya yena:

⁷ Swifuwo hinkwaswo, leswikulu ni leswitsongo, ni swiharhi swa nhova,

⁸ ni tinyanyana empfhukeni ni tinhlampfi ematini, ni swivumbiwa hinkwaswo leswi famba-fambaka elwandle.

⁹ We HOSI, N'wini wa hina, vito ra wena ri dzuneka ngopfu emisaveni hinkwayo!