Pisalema 77 - BIBELE Mahungu Lamanene

Xikwembu i muchaveleri wa lava nga khombyeni

Risimu ra Muyimbelerisi, ra Yedutuni. Pisalema ya Asafa.

¹ Ndzi huwelela eka Xikwembu hi rito leri tlakukeke; ndzi huwelela eka xona, hikuva xi ta ndzi yingisa.

² Enkarhini wa khombo, ndzi lava N'wini wa hinkwaswo, ndzi tshambuluta mavoko ndzi n'wi khongela ndzi nga karhali, kambe moya wa mina a wu chaveleleki.

³ Loko ndzi anakanya Xikwembu, ndzi twa ku vava; ndzi hela matimba loko ndzi ehleketa tindlela ta xona.

⁴ We Xikwembu, u ndzi tsona vurhongo vusiku hinkwabyo; ndzi karhateka ngopfu, ndzi tsandzeka ni ku vulavula.

⁵ Ndzi anakanya masiku lama hundzeke, ndzi tsundzuka ni malembe ya khale.

⁶ Nivusiku ndzi vulavula hi mbilu, ndzi tiehleketa ni ku tivutisa, ndzi ku:

⁷ “Xana N'wini wa hinkwaswo ú hi tshikele makumu ke? Xana a nge he tlheli a hi amukela xana?

⁸ Xana rirhandzu ra yena ri lo nyamalala ke? Xana switshembiso swa yena swi lo helela empfhukeni xana?

⁹ Xana Xikwembu xi lo rivala ku va ni tintswalo xana, xana xi ala ku hi twela vusiwana hileswi xi hlundzukeke xana?”

¹⁰ Kutani mina ndzi ri: “Leswi swi ndzi vavisaka ngopfu hi leswi: Xikwembu xa le henhla-henhla a xa ha hi lweli kukotisa khale!”

¹¹ We HOSI, ndzi anakanya mintirho ya wena, ndzi tsundzuka mahlori lawa u ma endleke khale.

¹² A ndzi rivali leswi u swi endleke, mintirho ya wena hinkwayo ndza yi tsundzuka.

¹³ We Xikwembu, matirhele ya wena ma hlawulekile, a ku na Xikwembu xin'wana lexi ringanaka na wena hi vukulu.

¹⁴ Hi wena Xikwembu lexi endlaka mahlori, u komba matimba ya wena exikarhi ka vamatiko.

¹⁵ Hi matimba ya wena, u kutsurile vanhu va wena, va nga va ka Yakobo ni va ka Yosefa.

¹⁶ Loko mati ma ku vonile we Xikwembu, ndzi ri loko ma ku vonile, ma chavile, kutani swidziva swi rhurhumela.

¹⁷ Mapapa a ma chulula mati, tilo ri duma, miseve ya rihati yi ba hala ni hala.

¹⁸ Tilo a ri baleka swinene, ku ba xihuhuri, rihati ri voninga misava hinkwayo, kutani yi ninginika hi ku chava.

¹⁹ U boxile ndlela ya wena exikarhi ka lwandle, u tsemakanyile hi le swidziveni, kutani ku hava loyi a voneke minkondzo ya wena.

²⁰ U fambisile vanhu va wena kukota ntlhambi, u va risa hi Muxe na Aroni.