Pisalema 76 - BIBELE Mahungu Lamanene

Xikwembu i Muhluri

Risimu ra Muyimbelerisi, leri hlaveleriwaka hi swipendana. Pisalema ya Asafa.

¹ Etikweni ra Yuda, Xikwembu xa tiveka, vito ra xona ra xiximiwa exiharhi ka Vaisraele.

² Yerusalema i muti wa xona, xi tshama entshaveni ya Siyoni.

³ Hi kona laha xi nga tshova swo lwa nyimpi ha swona, yi nga miseve leyi pfurhaka, ni switlhangu ni matlhari.

⁴ We Xikwembu, u dzuneka ngopfu, vukulu bya wena byi tlula ni tintshava ta khale.

⁵ Masocha lama tiyeke ma hlaseriwile ma ha etlele, ma tekeriwa leswi a ma swi phanghile; a ku vanga na nhenha na yin'we leyi koteke ku tlakusa voko.

⁶ We Xikwembu xa Yakobo, u lo na va tshinya, vo wela hansi ni tihanci ta vona.

⁷ We HOSI wa chavisa! Loko u hlundzukile, ku hava loyi a nga yimaka emahlweni ka wena.

⁸ U twarisa ku avanyisa ka wena u ri ehenhla tilweni, kutani vanhu hinkwavo va tshuka, va tsandzeka ni ku vulavula,

⁹ hikuva wena Xikwembu, u tile ku ta avanyisa vanhu, ni ku kutsula hinkwavo lava xanisekaka laha misaveni.

¹⁰ Hambi va ri va le Edomu va nga vanhu va tihanyi, va ta ku dzunisa, masalela ya va ka Hamati ma ta ku endlela nkhuvo.

¹¹ Tiboheni eka HOSI Xikwembu, mi humesa leswi mi nga hlambanya ku humesa swona; hinkwavo lava va xi tirhelaka a va humese tinyiko, va luva Xikwembu lexi xo chavisa.

¹² Hi xona xi tsongahataka vatikukumuxi, hambi ti ri tihosi ta laha misaveni ta rhurhumela emahlweni ka xona.