Pisalema 75 - BIBELE Mahungu Lamanene

Xikwembu i muavanyisi wa vanhu hinkwavo

Risimu ra Muyimbelerisi, hi mayimbelele ya risimu leri nge “U nga tshuki u swi herisa”. Pisalema ya Asafa.

¹ Ha ku tlangela we Xikwembu, ha ku tlangela! U le kusuhi na hina, kutani vanhu va fanele ku twarisa mintirho ya wena leyo hlamarisa.

² Xikwembu xi ri: “Enkarhini lowu ndzi wu vekeke, ndzi ta avanyisa vanhu hi ku lulama.

³ Hambiloko misava yi tsekatseka ni vaaki va yona hinkwavo, mina ndza ha ta tiyisa masungulo ya yona.

⁴ Hikokwalaho, ndzi byela vatikurisi ndzi ri: Tshikani ku tikurisa! Eka lavo homboloka, ndzi ri: Mi nga tshembi matimba ya n'wina!

⁵ Ina, tshikani ku titshemba hi ndlela leyi, mi nga vuli leswaku mi tiye ngopfu, tshikani ku tikukumuxa loko mi vulavula!”

⁶ Hakunene ku tlakusiwa a ku humi evuxeni kumbe evupeladyambu, a ku humi emananga,

⁷ hikuva i Xikwembu lexi avanyisaka, van'wana xa va tsongahata, van'wana xa va tlakusa.

⁸ HOSI Xikwembu xi tamele xinwelo xa vukari bya xona, lexi teleke hi vhinyo leyo bava leyi xi yi hlanganiseleke swinene; xi ta yi nyika vanhu hinkwavo lavo homboloka, xi va sindzisa ku yi nwa va heta.

⁹ Loko ndzi ri mina, a ndzi nga tshiki ku twarisa Xikwembu xa Yakobo, ndzi ta xi dzunisa hi tinsimu.

¹⁰ Xikwembu xi ri: “Ndzi ta herisa matimba ya lavo homboloka, kambe lavo lulama, ndzi ta va engetelela ntamu.”