Pisalema 74 - BIBELE Mahungu Lamanene

Xikhongelo xo kombela ku lweriwa eka valala

Swiletelo swa Asafa.

¹ We Xikwembu, xana u hi tshikele yini? U nga va u hi tshikele makumu xana? Xana u hi hlundzukelela yini, hina hi nga ntlhambi lowu u wu risaka, xana?

² Anakanya vanhu va wena lava u nga tihlawulela vona ku sukela khale, va nga lava u va kutsuleke leswaku va va ndzhaka ya wena. Tsundzuka ni ntshava ya Siyoni leyi khale a wu tshama eka yona.

³ Famba-famba emarhumbini lawa ku nga khale ma ri kona, hikuva valala va hina va onhile hinkwaswo exivandleni lexo hlawuleka.

⁴ Lava lwaka na wena va bile huwa endzeni ka Tempele ya wena; va dzimile mijeko kona ku komba leswaku va hlurile.

⁵ A swi fana ni loko munhu a ya nghena exihlahleni a tlakuse xihloka:

⁶ Mapulangi hinkwawo lama kevetliweke va ma fayeterile hi swihloka ni tihamula.

⁷ Xivandla xa wena lexo hlawuleka va xi hisile, va wisile ni ku fayetela yindlu leyi vito ra wena ri twarisiwaka eka yona.

⁸ Etimbilwini ta vona a va ku: “Hi ta va herisa!” Kutani va hisile tindhawu hinkwato leti vanhu va ku khongelaka eka tona we Xikwembu.

⁹ A wa ha vonaki exikarhi ka hina, ni vaprofeta va nyamalarile, kutani a ku na munhu exikarhi ka hina la tivaka leswaku swi ta hela rini.

¹⁰ We Xikwembu, xana valala va ta ku hlekula ku fikela rini, xana lava lwaka na wena va ta ku sandza hilaha ku nga heriki xana?

¹¹ U khondlela yini mavoko, u alela yini ku hi lwela ke?

¹² We Xikwembu, u mufumi wa hina ku sukela khale, u hi ponisile ko tala laha misaveni.

¹³ U miyetile lwandle hi matimba ya wena, swiharhi leswikulu swa le matini u swi fayile tinhloko,

¹⁴ Na Levhiyatani nyoka ya le lwandle u yi fayile nhloko, u yi nyika swiharhi swa le mananga swi yi dya.

¹⁵ Hi wena u khulukiseke swihlovo ni swinambyana, kambe milambu leyi a yi tshama yi ri karhi yi khuluka, u yi phyisile.

¹⁶ Vusiku byi le mavokweni ya wena, na wona nhlekanhi wu fumiwa hi wena, u vekile dyambu ni tinyeleti etindhawini ta swona.

¹⁷ Misava hinkwayo yi pimiwile hi wena, u endlile ximumu ni xixika.

¹⁸ We HOSI, tsundzuka leswaku valala va wena va ku sandza, vatiarisi lava va tlanga hi vito ra wena.

¹⁹ U nga tshuki u pfumela leswaku vanhu lava u va rhandzaka va nyiketiwa eka swiharhi leswi; swisiwana swa wena u nga swi rivali ni siku ni rin'we.

²⁰ Tsundzuka ntwanano lowu u wu endleke na hina, hikuva etindhawini leto tala laha tikweni ku tumbele vanhu va tihanyi.

²¹ U nga pfumeli leswaku lava xanisiwaka va tlhela ni tingana; swisiwana ni vapfumari a va twarise vito ra wena.

²² We Xikwembu, suka u yima u vulavula hi wexe, tsundzuka leswaku vatiarisi lava va le ku ku sandzeni minkarhi hinkwayo.

²³ Twana huwa leyi vangiwaka hi valala va wena; pongo leri va ri endlaka minkarhi hinkwayo, u nga ri bi hi makatla.