Pisalema 73 - BIBELE Mahungu Lamanene

Xiyenge xa vunharhu (Tipisalema 73 – 89) Ku va ni Xikwembu i nkateko lowukulu

Pisalema ya Asafa.

¹ Xikwembu xi komba Vaisraele vunene bya xona lebyikulu, xi komba ni hinkwavo va timbilu leto tenga.

² Kambe mina ndzi lavile ku hambuka endleleni, eku fambeni ka mina ndzi lo pona ku rheta ndzi wa,

³ hikuva ndzi naverile swa lavo homboloka, lava humelelaka hambileswi va tikurisaka ngopfu.

⁴ Vanhu lava a va karhatiwi hi nchumu, va dya va xurha va kondza va ya esirheni.

⁵ A va weli emakhombyeni kukota vanhu van'wana, a va vonisiwi maxangu ku fana ni vanhu-kulobye.

⁶ Hikokwalaho ku tikurisa i vuhlalu bya vona bya le nhan'wini, tihanyi i xiambalo xa vona.

⁷ Mahlo ya vona ma nyupela emafurheni ma nga ha vonaki. kambe makungu ya vona ya le mbilwini ma tikomba swinene.

⁸ Va sandza van'wana, va vulavula leswo biha, va kanela makungu yo xanisa lava nga hansi ka vona.

⁹ Va rhuketela Xikwembu xa le matilweni, ni laha misaveni tindzimi ta vona a ti tsetseleli munhu.

¹⁰ Hikokwalaho, ni vanhu va Xikwembu va va namarhela, va va dzunisa va nga voni xo biha eka vona.

¹¹ Va vulavula va ku: “Xikwembu a xi tivi nchumu! Xana loyi a nga henhla-henhla a nga vona yini xana?”

¹² Lavo homboloka i vanhu vo tano; minkarhi hinkwayo va le ku tiphineni, rifuwo ra vona ri ya ri andza.

¹³ Ku hanya eku lulameni ni ku chava ku endla xidyoho, a swi ndzi pfunanga nchumu,

¹⁴ hikuva ndzi biwa hi makhombo siku rin'wana ni rin'wana, mixo wun'wana ni wun'wana, ndzi le ku tshinyiweni.

¹⁵ Kambe loko onge ndzi vulavurile ku fana na vona, a ndzi ta va ndzi dyohele vanhu va wena.

¹⁶ Mhaka leyi yi ndzi tikele ngopfu loko ndzi yi anakanya,

¹⁷ ndzi kondza ndzi ya nghena exivandleni xa wena lexo hlawuleka we Xikwembu, kutani hi kona ndzi twisiseke mahelele ya lavo homboloka.

¹⁸ We Xikwembu, u va veka laha ku rhetaka, u va wisela entlhan'wini wa vuxisi bya vona.

¹⁹ Hi ku copeta ka tihlo, va khomiwa hi ku chava va herisiwa, va kukuriwa va nyamalala.

²⁰ Loko u fika, we N'wini wa hinkwaswo, va lahlekeriwa hi ndzhuti, va hangalaka kukota norho nimixo.

²¹ Loko ndza ha khunguvanyekile emoyeni, ni loko mbilu ya mina ya ha twa ku vava,

²² a ndzi hundzukile ntlunya, ndzi nga twisisi nchumu, ndzi fana ni xiharhi emahlweni ka wena.

²³ Hambiswiritano, a ndzi tshiki ku va na wena; u ndzi khoma hi voko ra xinene,

²⁴ u ndzi fambisa hi swiletelo swa wena, kutani eku heteleleni, u ta ndzi amukela eku dzunekeni ka wena.

²⁵ Xana ndzi nga va na mani ematilweni loko ku nga ri wena, ni kwala misaveni ndzi nga ha navela yini, leswi ndzi nga na wena ke?

²⁶ Emirini ni le moyeni ndzi nga hela matimba, kambe Xikwembu hi xona xi ndzi tiyisaka xi ndzi katekisa.

²⁷ Lava hambanaka na wena va nge poni, va ta lova, hinkwavo lava va ku tshikaka, lava lwaka na wena, u ta va pfala milomo.

²⁸ Loko ndzi ri mina, ndzi tsakela ku va kusuhi na wena we Xikwembu, we HOSI N'wini wanga, ndzi kumile khokholo eka wena, kutani ndzi ta twarisa hinkwaswo leswi u swi endleke.