Pisalema 72 - BIBELE Mahungu Lamanene

Hosi ya tiko a yi fume hi ku lulama

Xikhongelo xo khongelela Solomoni.

¹ We Xikwembu, komba hosi ya tiko ndlela yo lulama, u dyondzisa loyi vuhosi byi nga bya yena maavanyisele lamanene,

² leswaku a avanyisela vanhu timhaka ta vona hi nawu, a biyelela swisiwana swa wena.

³ Tintshava ni switsunga a swi humesele vanhu endzalo, hikuva ku ni ku lulama etikweni.

⁴ Mufumi wa tiko a a sirhelele swisiwana; a a pfune lava pfumalaka, kambe a herisa vaxanisi,

⁵ leswaku minkarhi hinkwayo vanhu va ta chava wena ntsena, dyambu ni n'weti swi kondza swi hela.

⁶ Mufumi wa tiko a a fane ni mpfula leyi nelaka swimila; a a fane ni swimpfulana leswi tsutsuxaka kunene.

⁷ A ku ve ni ku lulama enkarhini wa ku fuma ka yena, ku rhula ku va kona ku kondza n'weti wu nga ha vonaki.

⁸ Mfumo wa yena a wu nave ku sukela eka lwandle rin'wana, wu ya fika eka lerin'wana; a wu sukele enambyeni wa Yufrata, wu ya fika evugimamusi.

⁹ Lava tshamaka emananga, a va n'wi tirhele, valala va yena a va wele hansi va funya ritshuri.

¹⁰ Tihosi ta matiko hinkwawo ya le kule a ti n'wi humesele ndzuvo, va le Xeba ni va le Seba a va n'wi tisele tinyiko.

¹¹ Tihosi hinkwato a ti n'wi nkhinsamele, vanhu va tinxaka hinkwato va n'wi tirhela.

¹² Hakunene loko swisiwana ni lava pfumalaka mupfuni va huwelela eka yena, wa va kutsula.

¹³ Lava tsaneke ni vapfumari, wa va twela vusiwana, ú sirhelela vutomi bya vona.

¹⁴ Wa va humesa emaxangwini ni le tinyimpini, hikuva a nga lavi leswaku va dlayiwa.

¹⁵ Mufumi wa tiko a a hanye malembe layo tala, vanhu va n'wi luva hi nsuku wa le Xeba; a va n'wi khongelele minkarhi hinkwayo, masiku hinkwawo va kombela leswaku Xikwembu xi n'wi katekisa.

¹⁶ A ku ve ni mavele layo tala etikweni, a ma kule ma bela hi moya emagangeni; ntshovelo wa kona a wu fane ni wa le Lebanoni, naswona a ku ve ni ndzalo emitini ku fana ni byanyi enhoveni.

¹⁷ Vito ra mufumi wa tiko a ri tiviwe hilaha ku nga heriki, a ri twakale hinkwako ehansi ka dyambu. Vanhu hinkwavo a va navelelane minkateko hi vito rero, matiko hinkwawo ma tlangela yena n'wini wa rona.

¹⁸ A ku nkhensiwe HOSI Xikwembu xa Israele, hikuva hi xona ntsena xi endlaka mahlori!

¹⁹ Minkarhi hinkwayo a ku tlangeriwe vito ra xona lero hlawuleka, ku dzuneka ka xona a ku tate misava hinkwayo. Amen! Amen!

²⁰ Swikhongelo swa Davhida n'wana Yese swi helela kwala.