Pisalema 71 - BIBELE Mahungu Lamanene

Xikhongelo xa munhu loyi a dyuhaleke

¹ We HOSI, ndzi ta ka wena leswaku u ta ndzi lwela, u nga pfumeli leswaku ndzi khomiwa hi tingana.

² We Xikwembu xo tshembeka, ndzi ntshunxe u ndzi sirhelela; ndzi yingise u ndzi ponisa,

³ u va ribye ro tiya leri ndzi tumbelaka eka rona, leri u ri lulamiseke leswaku ndzi hlayiseka eka rona. Hakunene, hi wena ribye ra mina ni khokholo ranga.

⁴ We Xikwembu xanga, ndzi kutsule emavokweni ya lavo homboloka, ndzi biyelele eka vanhu lavo biha va tihanyi.

⁵ Ndzi tshemba wena, we N'wini wanga, ndzi ku tshembile ku sukela evuhlangini bya mina we HOSI.

⁶ Ku sukela siku leri ndzi nga velekiwa ha rona, ndzi tiseketela hi wena, hi wena u ndzi humeseke ekhwirini ra manana. Ndzi nga ka ndzi nga tshiki ku ku dzunisa.

⁷ Vanhu lavo tala va ndzi hlamala, hikuva hi wena khokholo ra mina.

⁸ Masiku hinkwawo ndzi yimbelela tinsimu, ndzi tlangela ku dzuneka ka wena.

⁹ Ndzi dyuhele, kambe u nga ndzi cukumeti! Hambileswi ndzi heleriweke hi matimba, u nga ndzi tshiki,

¹⁰ hikuva valala va mina va ndzi tshama xikungu, va lava ku ndzi dlaya, va byeletelana

¹¹ va ku: “Xikwembu xi n'wi fularhele, a hi n'wi hlongoriseni hi n'wi khoma, hikuva ku hava loyi a nga n'wi lamulelaka.”

¹² We Xikwembu, hatlisa u ta ndzi pfuna, u nga yimi kule na mina, wena Xikwembu xanga!

¹³ Lava va ndzi lumbetaka, a va khomiwe hi tingana va herisiwa, lava ringetaka ku ndzi vavisa, a va tivangele ku soriwa ni mindzhukano.

¹⁴ Kambe mina a ndzi nga tshiki ku ku tshemba, ndza ha ta ya emahlweni ndzi ku dzunisa.

¹⁵ Siku rin'wana ni rin'wana, ndzi ta vula leswaku u Xikwembu xo tshembeka, ni leswaku u ponisa vanhu. Hakunene mintirho ya wena i ntsandza-vahlayi.

¹⁶ Ndzi ta ta eka wena ndzi ta vula mintirho ya wena ya matimba, we HOSI N'wini wa hinkwaswo, ndzi ta byela vanhu leswaku hi wena ntsena la lulameke.

¹⁷ We Xikwembu, u ndzi dyondzisile ku sukela evuntshweni bya mina, hikokwalaho ni sweswi ndza ha twarisa mintirho ya wena leyo hlamarisa.

¹⁸ Hambileswi ndzi baseke nhloko, u nga ndzi tshiki we Xikwembu, ndzi ta kota ku twarisa matimba ya wena lamakulu eka vanhu va nkarhi lowu ni ka lava va ha taka.

¹⁹ We Xikwembu, ku lulama ka wena i kukulu kukota matilo. U tirhile leswikulu ngopfu, ku hava loyi a ringanaka na wena we Xikwembu.

²⁰ Wena u ndzi hundziseke emaxangwini ne makhombyeni layo tala, u ta tlhela u ndzi hanyisa, u ta tlhela u ndzi humesa ematimbeni ya rifu.

²¹ U ta engeta u ndzi nyika ndzhuti, u tlhela u ndzi tiyisa.

²² Loko ndzi ri mina, ndzi ta ku twarisa hi haripa, ndzi vula ku tshembeka ka wena Xikwembu xanga; ndzi ta ku dzunisa hi xitende, wena Muhlawuleki wa Israele.

²³ Loko ndzi ri karhi ndzi ku tlangela, ndzi ta ba nkulungwana hi mhaka ya leswi u ndzi kutsuleke.

²⁴ Masiku hinkwawo ndzi ta vula hilaha u ndzi lweleke hakona, hikuva lava a va ringeta ku ndzi vavisa, va khomiwe hi tingana va tsongahatiwa.