Pisalema 7 - BIBELE Mahungu Lamanene

Xikhongelo xo kombela ku avanyiseriwa timhaka hi ku lulama

Risimu ra xirilo leri Davhida a khongeleke HOSI Xikwembu ha rona, hi mhaka ya Kuxi wa nyimba ya ka Benjamini.

¹ We HOSI Xikwembu xanga, ndzi tumbela eka wena; ndzi ponise, u ndzi lamulela eka hinkwavo lava va ndzi hlongorisaka,

² hikuva va nga ndzi handzulela ku fana ni tinghala, va ndzi koka va famba na mina, ku nga ri na loyi a ndzi kutsulaka.

³ We HOSI Xikwembu xanga, loko ndzi endlile leswi va swi vulaka, loko ndzi nyamisile mavoko ya mina hi mintirho ya tihanyi,

⁴ loko ndzi dyoherile nakulorhi, kumbe loko ndzi phanghile swa nala wa mina ku nga ri na xivangelo,

⁵ nala loyi a a ndzi hlongorise a ndzi khoma, a wisela vutomi bya mina ehansi a byi kandziyela, a cukumeta ku dzuneka ka mina eritshurini.

⁶ We HOSI, suka u yima u hlundzukile, tlakuka u tela valala va mina lava levaka; pfuka u ndzi lwela, wena u lavaka leswaku timhaka ti avanyisiwa hi ku lulama.

⁷ Hlengeleta matiko ma ku rhendzela, kutani u ma fuma u ri ehenhla.

⁸ We HOSI, hi wena u avanyisaka vanhu; yima na mina loko u avanyisa, hikuva ndzi munhu wo lulama, ni nandzu ndzi hava.

⁹ Herisa ku biha ka lavo homboloka, u tiyisa lavo lulama, hikuva u Xikwembu xo lulama, wena u kambelaka timbilu ni miehleketo.

¹⁰ Xitlhangu xa mina xi le ka Xikwembu, mulweri wa lava timbilu leti tengeke.

¹¹ Muavanyisi wo lulama i Xikwembu, xona lexi tshinyaka vaonhi minkarhi hinkwayo.

¹² Loko munhu wo biha a nga hundzuki, Xikwembu xi ta lota banga ra xona, xi konga vurha bya xona xi byi rhiya;

¹³ xi n'wi copa hi switlhavana swa xona leswi dlayaka, xi hoxa ndzilo hi miseve ya xona.

¹⁴ Hi luya lowo homboloka, u ehleketa ku dyoha, manyala u lo hliki, hi wona, u humesa mavunwa ntsena.

¹⁵ U cela rindzi a ri entisa, kambe a tlhela a ya wela eka rona.

¹⁶ Manyala ya yena ma vuya hi yena, tihanyi ta yena ti tlhelela enhlokweni ya yena.

¹⁷ Ndzi ta tlangela HOSI hikwalaho ka ku lulama ka yona, ndzi yimbelela ndzi dzunisa vito ra HOSI, xona Xikwembu-xa-le-henhla-henhla.