Pisalema 69 - BIBELE Mahungu Lamanene

Xikwembu xi pfuna lava nga khombyeni

Risimu ra Muyimbelerisi, leri hlaveleriwaka hi switende. Pisalema ya Davhida.

¹ We Xikwembu ndzi ponise, hikuva ndzi lava ku dyiwa hi mati.

² Ndzi hoxiwe ekheleni leri enteke ra ndzhope, ku hava laha ndzi nga kandziyaka kona; ndzi cukumetiwe exidziveni, maboboma ma ndzi khubumeta.

³ Nkolo wa mina wu twa ku vava, hikuva ndzi huwelele ngopfu, kutani ndzi karhele, ni mahlo ya mina ma fehla hi ku ku langutela, we Xikwembu xanga.

⁴ Lava va ndzi vengaka mahala, va tele ku tlula misisi ya nhloko ya mina; valala va mina lava, va ni matimba va ringeta ku ndzi herisa, va ndzi hembela va ku ndzi fanele ku tlherisa leswi ndzi nga swi yivangiki.

⁵ We Xikwembu, u tiva vuphukuphuku bya mina, milandzu ya mina ndzi nge koti ku ku fihlela yona.

⁶ We N'wini wa hina, HOSI ya matimba hinkwawo, wena Xikwembu xa Israele, u nga pfumeli leswaku lava va ku tshembaka ni ku ku khongela, va khomiwa hi tingana ni ku tsongahatiwa hikwalaho ka mina.

⁷ Ndzi tshemba wena ntsena, kambe hi swona swi ndzi vangelaka tingana ni ku rhuketeriwa hi vanhu.

⁸ Hambi va ri vamakwerhu, ndzi hundzuke muluveri eka vona, vanhu va ka hina a va ha ndzi tivi.

⁹ Ku hisekela yindlu ya wena swa ndzi dya, lava va ku rhuketelaka, va rhuketela mina.

¹⁰ Ndza rila ndzi titsona swakudya, kambe sweswo swi ndzi vangela ndzhukano ntsena.

¹¹ Loko ndzi ambala swiambalo swa nkosi, va ndzi hlekula hikwalaho ka swona.

¹² Lava dzumbaka enyangweni ya muti, va vulavula hi mina, va ndzi hlekula hi tinsimu emabyalweni.

¹³ Loko ndzi ri mina we HOSI, ndzi khongela wena ntsena enkarhini lowu lavekaka. We Xikwembu, ndzi hlamule hi rirhandzu ra wena lerikulu, hikuva hi wena muponisi la tshembekaka.

¹⁴ Ndzi humese endzhopeni leswaku wu nga tshuki wu ndzi mita; ndzi ponise eka lava va ndzi vengaka, u ndzi tsavula exidziveni xa mati.

¹⁵ U nga pfumeli leswaku maboboma ni magandlati, swi ndzi khubumeta ndzi nyamalala; u nga ndzi tshiki ndzi seleteriwa ekheleni ra vafi.

¹⁶ We HOSI ndzi hlamule, hikuva rirhandzu ra wena ri saseke ngopfu; etintswalweni ta wena letikulu, hundzuluka u ndzi languta.

¹⁷ Ndzi nandza wa wena, hikokwalaho u nga ndzi fularheli; ndzi le maxangwini, hatlisa u ndzi hlamula.

¹⁸ Tshinela kusuhi na mina, u ndzi lamulela, u ndzi ponisa emavokweni ya valala.

¹⁹ Wa swi tiva leswaku ndzi rhuketeriwa ngopfu, u tiva ni tingana leti ndzi khomisiwaka tona; valala va mina hinkwavo va tiva hi wena.

²⁰ Va ndzi rhuketele ku kondza mbilu ya mina yi vava, kutani ndzi hela ntamu. Ndzi lavile wo ndzi twela vusiwana, kambe a ndzi n'wi kumanga, ndzi pfumarile ni muchaveleri.

²¹ Va ndzi phamele swakudya leswi cheriweke murhi wo dlaya, loko ndzi twa torha, va ndzi nwisa ntsuvi.

²² Swakudya swa vona a swi hundzuke ntlhamu, swi dlaya vona vinyi ni vanghana va vona.

²³ Va dlaye mahlo leswaku va nga ha voni, rhurhumerisa minhlana ya vona minkarhi hinkwayo.

²⁴ Va hlundzukele swinene, u va ba hi vukari bya wena lebyi hisaka.

²⁵ Mixaxa ya vona a yi hundzuke marhumbi, ku nga ha vi na munhu la tshamaka eka yona,

²⁶ hikuva va xanisa munhu loyi wena u n'wi beke, loyi u n'wi boxeke timbanga, va ya mahlweni va n'wi pfatlanya.

²⁷ Vanhu lava, va vone nandzu minkarhi hinkwayo, u nga tshuki u va tsetselela.

²⁸ Sula mavito ya vona ebukwini ya vutomi, ma nga ha tsariwi swin'we ni mavito ya lavo lulama.

²⁹ Mina a ndzi munhu wa nchumu, ndzi khomiwe hi switlhavi; we Xikwembu, hi wena ntsena u nga ndzi ponisaka, u ndzi sirhelela.

³⁰ Ndzi ta yimbelela ndzi tlangela Xikwembu, ndzi ta xi dzunisa hi risimu ra ku nkhensa,

³¹ kutani leswi swi ta tsakisa HOSI Xikwembu ku tlula loko munhu a xi humesela tihomu tinene, a xi gandzela ha tona.

³² N'wina mi xanisekaka, vonani leswi humelelaka mi tsaka, n'wina mi khongelaka Xikwembu tsakani mi kuma matimba,

³³ hikuva HOSI Xikwembu xi pfuna lava nga khombyeni, a xi rivali vanhu va xona lava bohiweke.

³⁴ Matilo ni misava a swi dzunise Xikwembu, na rona lwandle ni swivumbiwa swa kona hinkwaswo a swi tlangele xona,

³⁵ hikuva Xikwembu xi ta ponisa muti wa Siyoni, xi tlhela xi pfuxa miti ya Yuda, kutani malandza ya xona ma ta tshama kona, ma ta teka tiko ri va ra wona;

³⁶ Vana va wona va ta nyikiwa rona ri va ndzhaka ya vona, hikuva lava rhandzaka Xikwembu va ta tshama eka rona.