Pisalema 68 - BIBELE Mahungu Lamanene

Xikwembu i muhluri

Risimu ra Muyimbelerisi. Pisalema ya Davhida.

¹ Loko Xikwembu xi humelela, valala va xona va hangalaka, lava va xi vengaka, va suka va tsutsuma.

² Lavo homboloka, u va hangalasa we Xikwembu, va nyamalala ku fana ni musi lowu hahisiwaka, va herisiwa emahlweni ka wena kukota mafurha endzilweni.

³ Kambe lavo lulama va tsaka hi ntsako lowukulu, va cina emahlweni ka wena!

⁴ Dzunisani Xikwembu hi tinsimu, mi twarisa vito ra xona. Khulelani ndlela ya Loyi a fambaka hi mapapa, hikuva vito ra yena i HOSI; banani nkulungwana emahlweni ka yena.

⁵ Tata wa lava pfumalaka vatswari ni musirheleli wa tinoni, i Xikwembu lexi tshamaka exivandleni lexo hlawuleka.

⁶ Vanhu lava nga ni xivundza, Xikwembu xi va nyika vutshamo, xi ntshunxa lava bohiweke, kambe lava tiarisaka va ta tshama emakwandzasini.

⁷ We Xikwembu, siku u humeke ni vanhu va wena u tsemakanya na vona mananga,

⁸ misava a yi tsekatseka, matilo ma chulula mpfula emahlweni ka wena Xikwembu xa le Sinayi, emahlweni ka wena Xikwembu xa Israele.

⁹ We Xikwembu, u nisile timpfula letikulu, u pfuxetile tiko ra wena, hikuva a ri herile matimba.

¹⁰ Vanhu va wena va kumile vutshamo eka rona, hikuva u Xikwembu lexi nga ni vunene, lexi tiyisaka swisiwana.

¹¹ N'wini wa hinkwaswo ú lo vulavula kunene, kutani ntshungu wa vavasati wu huwelela hi ku tsaka wu ku:

¹² “Tihosi ni mavuthu ya tona hi letiyaa, ta baleka, ta baleka! Hina vavasati hi ta phakelana swilo swa nkoka leswi phanghiweke hi ri emakaya,

¹³ swo kota swifaniso swa matuva, leswi nga ni timpapa leti nameketiweke silivhere ni tinsiva to vangama ta nsuku. Xana ma ha salela yini le handle ematshangeni xana?”

¹⁴ Hi siku leri Xikwembu-xa-matimba-hinkwawo xi hluleke tihosi enyimpini, mintsumbu a yi fana ni gamboko entshaveni ya Salimoni!

¹⁵ Ntshava ya Baxani i ntshava ya swikwembu, leyi nga ni tinhlohlorhi leto tala.

¹⁶ We ntshava ya tinhlohlorhi leto tala, hikwalaho ka yini u swondzolota ntshava leyi Xikwembu xi nga tihlawulela yona xana? HOSI Xikwembu xi ta tshama eka yona hilaha ku nga heriki!

¹⁷ Xikwembu xi sukile entshaveni ya Sinayi, xi ri ni magidi-gidi ya makalichi ya nyimpi, kutani xi ya nghena exivandleni lexo hlawuleka.

¹⁸ We Xikwembu, u tlhandlukele entshaveni leyo leha u ri karhi u fambisa lava u va khomeke enyimpini; u amukerile tinyiko eka vanhu, hambi ti ri ta lava tiarisaka, kutani u ta tshama exivandleni xexo we Xikwembu.

¹⁹ A ku nkhensiwe N'wini wa hinkwaswo, hikuva wa hi hlayisa siku rin'wana ni rin'wana; Xikwembu i muponisi wa hina.

²⁰ Xikwembu xa hina i Xikwembu lexi ponisaka; HOSI N'wini wa hinkwaswo hi yena la hi humesaka ematimbeni ya rifu.

²¹ Xikwembu xi ta fayetela tinhloko ta valala va xona, xi guvula misisi ya lava yaka emahlweni ni ku dyoha.

²² N'wini wa hinkwaswo ú te: “Valala va mina, ndzi ta va hlongola va suka eBaxani, ndzi ta va tsavula elwandle.

²³ N'wina mi ta hlamba milenge mi susa ngati ya vona leyi yi nga mi tlhambukela; timbyana ti ta dya mintsumbu ya vona!”

²⁴ We Xikwembu mufumi wa mina, vanhu va wena va vonaka va longolokile, va kongoma exivandleni xa wena lexo hlawuleka;

²⁵ vayimbeleri va rhangile emahlweni, va landza hi vanhwanyana lava baka swingomana, endzhaku ka vona ku ta vachayi va swichaya-chayani.

²⁶ Va yimbelela va ku: “Eminkhubyeni ya n'wina, tlangelani Xikwembu, nkhensani HOSI, yona xihlovo xa Israele!”

²⁷ Emahlweni ku rhangile va ka Benjamini, va nga va nyimba leyitsongo, va landza hi tindhuna leto tala ta ka Yuda, ni ta ka Zebuloni ni ta ka Neftali.

²⁸ We Xikwembu, komba matimba lawa u hi poniseke ha wona, hi kombe ntamu wa wena we Xikwembu,

²⁹ u ri eTempeleni ya wena eYerusalema, kutani tihosi ti ta ku luva.

³⁰ Tshinya swiharhi swa le nhlangeni, ntlhambi lowu wa tinkuzi, va nga Vaegipta lava fumaka matiko, lava kandziyelaka van'wana ehansi va lava mali. Hangalasa vanhu lava vo tsakela tinyimpi!

³¹ Va le Egipta va ta humesa swibya swa koporo, va le Etiyopiya va ta khongela Xikwembu va tlakusile mavoko.

³² N'wina vafumi va misava, dzunisani Xikwembu hi tinsimu; yimbelelani mi twarisa N'wini wa hinkwaswo,

³³ yena loyi a famba-fambaka ehenhla, ematilweni lama nga va kona ni khale. Yingisani, ku twala rito ra yena, ri nga rito leri nga ni matimba.

³⁴ Tivisani vanhu leswaku Xikwembu xi ni ntamu, vuhosi bya xona byi ungamela Vaisraele, xi fuma xi ri henhla ematilweni.

³⁵ Loko Xikwembu xi huma eTempeleni ya xona, a hi ku chavisa ka xona! Hi xona Xikwembu xa Vaisraele lexi xi va tiyisaka, xi va nyikaka ntamu. A ku tlangeriwe Xikwembu!