Pisalema 67 - BIBELE Mahungu Lamanene

Matiko hinkwawo a ma dzunise Xikwembu

Risimu ra Muyimbelerisi, leri hlaveleriwaka hi swipendana. Pisalema.

¹ Xikwembu a xi hi twele vusiwana xi hi katekisa, a xi hi langute hi tintswalo,

² kutani vanhu va misava hinkwayo va ta tiva hilaha xi tirhaka hakona, ni leswaku hi xona xi ponisaka.

³ Vanhu va matiko a va ku dzunise we Xikwembu, hinkwavo a va ku dzunise.

⁴ Matiko a ma tsake ma ba nkulungwana, hikuva u ma fuma hi ku lulama, hi wena u fambisaka vanhu laha misaveni.

⁵ Vanhu va matiko a va ku dzunise we Xikwembu, hinkwavo a va ku dzunise.

⁶ Misava yi hi humesele mihandzu, Xikwembu, xona Xikwembu xa hina, xi hi katekisile.

⁷ Hakunene Xikwembu xi hi katekisile; hinkwako emisaveni, vanhu a va chave xona!