Pisalema 66 - BIBELE Mahungu Lamanene

Mintirho ya Xikwembu ya hlamarisa

Risimu ra Muyimbelerisi. Pisalema.

¹ N'wina hinkwenu vanhu va misava, banani minkulungwana mi dzunisa Xikwembu;

² yimbelelani mi twarisa vito ra xona, xi kombeni xichavo hi ku xi dzunisa.

³ Huwelelani emahlweni ka Xikwembu mi ku: “Mintirho ya wena ya hlamarisa; valala va wena va rhurhumela emahlweni ka wena, hikuva matimba ya wena i makulu.

⁴ Vanhu hinkwavo va misava va khongela wena; va yimbelela va ku dzunisa, va twarisa vito ra wena.”

⁵ Tanani mi ta hlalela mintirho ya Xikwembu: Xi endlile swilo leswo hlamarisa laha misaveni.

⁶ Xi hundzule lwandle ri va tiko leri omeke, vanhu va tsemakanyile nambu hi milenge. Hikokwalaho, a hi xi beleni nkulungwana!

⁷ Hi xona xi fumaka hi matimba hilaha ku nga heriki; minkarhi hinkwayo xi xiyaxiya vamatiko. Xi nge pfumeli leswaku lava tiarisaka va tikurisa.

⁸ N'we vanhu va tinxaka hinkwato, tlangelani Xikwembu xa hina, a ku twale mpfumawulo wa lava va xi dzunisaka,

⁹ hikuva hi xona xi hi nyikaka vutomi, xi nga ka xi nga hi tshiki hi wa.

¹⁰ We Xikwembu, tani hileswi silivhere yi basisiwaka hi ndzilo, na hina u hi kamberile u hi basisa hi ndlela yoleyo.

¹¹ U hi phasile hi ntlhamu, u hi rhwexe mpingu lowo tika.

¹² U tshikile valala va hina va hi kandziyela. U hi hundzisile hi le ndzilweni ni le swidziveni swa mati, kambe eku heteleleni u hi fikisile etikweni leri noneke.

¹³ Ndzi ta tisa swifuwo swa magandzelo lama hisiwaka endlwini ya wena, ndzi hetisisa leswi ndzi tiboheke ku ku humesela swona,

¹⁴ swi nga leswi ndzi ku tshembiseke swona hi nomo wa mina, enkarhini lowu a ndzi ri ekhombyeni.

¹⁵ Ndzi ta teka swifuwo leswi noneke, ti nga tinyimpfu ta makhuna ni tinkuzi ni timbuti, ndzi ku humesela magandzelo lama hisiwaka.

¹⁶ N'wina hinkwenu lava chavaka Xikwembu, tanani mi ta twa, ndzi mi byela leswi xi ndzi endleleke swona.

¹⁷ Ndzi huwelerile eka xona ndzi kombela ku pfuniwa, kutani ndzi hatle ndzi kota ku xi dzunisa.

¹⁸ N'wini wa hinkwaswo a a nga ta ndzi yingisa, loko a ndzi lo va ni makungu yo endla leswo biha.

¹⁹ Kambe Xikwembu xi ndzi yingisile hakunene, xi amukerile xikhongelo xa mina.

²⁰ A ku dzunisiwe Xikwembu, hikuva a xi alanga ku khongela ka mina, a xi tshikanga ku ndzi rhandza.