Pisalema 65 - BIBELE Mahungu Lamanene

Xikwembu N'wini wa hinkwaswo wa dzuneka

Risimu ra Muyimbelerisi. Pisalema ya Davhida.

¹ We Xikwembu, swa fanela leswaku u dzunisiwa emutini wa Siyoni, ni swilo leswi vanhu va tiboheke ku ku humesela swona, a va swi humese.

² U Xikwembu lexi yingisaka swikhongelo, hikokwalaho vanhu hinkwavo va ta eka wena.

³ Timhaka leti hi nga ku dyohela ha tona, ti hi tikela ku tlula mpimo, kambe wena u nga hi rivalela milandzu ya hina.

⁴ Ku katekile munhu loyi u n'wi hlawuleke ku tshama exivaveni xa muti wa wena, loyi u n'wi tshinetaka kusuhi na wena. Na hina hi tsakisiwa hi leswo saseka endlwini ya wena, swi nga leswo hlawuleka swa Tempele ya wena.

⁵ We Xikwembu muponisi wa hina, wa hi lwela, u hi hlamula hi tindlela leto hlamarisa; hambi va ri vanhu lava akeke ematikweni ya le kule entsungeni wa malwandle, va tshemba wena.

⁶ Hi matimba ya wena, u tiyisile tintshava, u ri karhi u komba vunhenha bya wena.

⁷ U miyeta huwa ya lwandle ni magandlati ya rona, u herisa na pongo ra vanhu va matiko.

⁸ Hikokwalaho, emisaveni hinkwayo vanhu va hlamala loko u va komba mintirho ya wena; ku sukela evuxeni ku ya fika evupeladyambu, u va bisa nkulungwana wa ntsako.

⁹ U tikarhatela misava hi ku yi nisela mpfula, u yi andzisela minkateko. We Xikwembu, mati ma khuluka emilambyeni ya wena, u mirisa mavele emasin'wini ya vanhu; misava ya kona u yi lulamisa swinene.

¹⁰ U cheleta laha ku rimiweke, u fayetela mabuwa ya kona hi mpfula, u hlekahlekisa misava hi n'wema, u mirisa swimilana eka yona.

¹¹ Lembe hinkwaro u ri sasekisa hi minkateko ya wena, kun'wana ni kun'wana laha u hundzaka kona, vanhu va dya va xurha.

¹² Madyelo ya rihlaza ma kumeka ni le mananga, emagangeni hinkwawo ku twala tinsimu ta ntsako.

¹³ Etimbaleni ku tele tinyimpfu ni timbuti. Mavele ma funengeta minkova, ntumbuluko hinkwawo wu yimbelela wu tsakile.