Pisalema 64 - BIBELE Mahungu Lamanene

Lavo lulama va titsakela eka Xikwembu

Risimu ra Muyimbelerisi. Pisalema ya Davhida.

¹ We Xikwembu, amukela xirilo xa mina; ndzi lamulele eka valala va mina, hikuva ndza va chava.

² Ndzi ponise emakungwini lama bohiweke exihundleni hi vanhu lavo homboloka, u ndzi phonyokisa eka wona,

³ hikuva ku vulavula ka vona ka tlhava kukota tlhari leri lotiweke, marito ya vona ma dlaya, onge i miseve leyi nga ni vuxungu.

⁴ Va tumbelela vanhu lava nga riki na nandzu, va hatla va va copa va nga kanakani.

⁵ Makungu ya vona layo biha a va hambani na wona, loko va ri exihundleni, va luka mano va ku: “Hi ta vona hi mani xana?”

⁶ Va boha makungu walawo, kutani va ku: “Hinkwaswo swi hetisekile, hi endlile hi vutlhari lebyikulu!” Leswi nga miehleketweni ya munhu a hi ku enta ka swona!

⁷ Kambe hi nkarhinyana, Xikwembu xi ta va copa hi nseve, kutani va ta vaviseka.

⁸ Va ta tiphasa hi ku vulavula ka vona, kutani vanhu lava va nga ta va vona, va ta hlakahla tinhloko;

⁹ hinkwavo va ta chava; va ta anakanya hinkwaswo leswi Xikwembu xi swi endleke, kutani va ta tivisa van'wana.

¹⁰ Lavo lulama a va titsakele eka HOSI Xikwembu, va tumbela eka xona; hinkwavo lava lulameke a va xi dzunise.