Pisalema 63 - BIBELE Mahungu Lamanene

Rirhandzu ra Xikwembu ri tsakisa ku tlula vutomi

Pisalema ya Davhida loko a ri emananga ya Yuda.

¹ We Xikwembu, u Xikwembu xa mina, ndza ku lava, ndzi ni torha ra wena. Mina hi xiviri xa mina ndza ku rilela, ku fana ni misava leyi omeke loko yi rilela mati.

² Ndzi ku langutile eTempeleni ya wena, ndzi vona matimba ya wena ni ku dzuneka ka wena.

³ Hikokwalaho ndzi ta ku dzunisa hi nomo wa mina: Rirhandzu ra wena ri tsakisa ku tlula vutomi!

⁴ Ndzi ta ku tlangela vutomi bya mina hinkwabyo; ndzi ta ku khongela ndzi tlakusile mavoko.

⁵ Ndzi titwa ndzi tsakile, onge ndzi lo dya nyama yo nona, kutani ndzi ba nkulungwana ndzi ku dzunisa.

⁶ Loko ndzi etlele, ndza ku anakanya, vusiku hinkwabyo ndzi vulavula na wena hi ku khongela.

⁷ Hakunene mupfuni wa mina hi wena, kutani ndzi yimbelela ndzi tsakile ehansi ka timpapa ta wena.

⁸ Ndzi namarhela wena hi mbilu ya mina hinkwayo, hikuva voko ra wena ra matimba ra ndzi hlayisa.

⁹ Kambe lava ringetaka ku ndzi dlaya, a ku rhange vona va ya exivandleni xa vafi.

¹⁰ A va dlawe hi tlhari, mintsumbu ya vona yi dyiwa hi makoti.

¹¹ Mufumi wa tiko a a titsakele eka Xikwembu; hinkwavo lava tinyiketeke eka xona, a va xi dzunise, kambe lava hembaka a va miyetiwe!