Pisalema 62 - BIBELE Mahungu Lamanene

Xikwembu hi xona ntsena xi nga muhlayisi

Risimu ra Muyimbelerisi, ra Yedutuni. Pisalema ya Davhida.

¹ Moya wa mina wu kuma ku wisa eka Xikwembu ntsena, ku ponisiwa ka mina ku huma eka xona.

² Hi xona ntsena xi nga ribye ra mina, khokholo ra mina ni muponisi wanga. Ku hava munhu na un'we la nga ndzi susaka.

³ Hikwalaho ka yini mi khitikana mi ta ndzi hlasela, mina loyi ndzi fanaka ni khumbi leri waka, kumbe rihlampfu leri boleke, xana?

⁴ Mi luka mano yo ndzi wisa exitulwini xa vuhosi. mi tsakela ku ndzi kanganyisa. Marito ya n'wina a hi ku tsakisa ka wona, kasi etimbilwini mi le ku ndzi rhukaneni.

⁵ Moya wa mina wu kuma ku wisa eka Xikwembu ntsena, hikuva xi ndzi nyika ku tshemba.

⁶ Hi xona ntsena xi nga ribye ra mina, khokholo ra mina ni muponisi wanga. Ku hava munhu loyi a nga ndzi susaka.

⁷ Eka Xikwembu ndzi kuma ku hlayiseka ni ku dzuneka, hi xona ribye ra mina lero tiya leri ndzi tumbelaka eka rona.

⁸ N'wina vanhu, tshembani Xikwembu minkarhi hinkwayo, xi tiviseni leswi nga timbilwini ta n'wina, hikuva hi xona ribye ra vutumbelo bya hina.

⁹ Vanhu hinkwavo, lavakulu ni lavatsongo, a hi nchumu, vo va moyanyana ntsena; loko va pimiwa exikalwini, va vevuka ku tlula ni risiva rinene.

¹⁰ U nga tshembi mintirho ya tihanyi, ku kanganyisa vanhu a swi nga ku vuyiseli nchumu. Hambiloko rifuwo ri nga ku talela, u nga tiseketeli ha rona.

¹¹ Xikwembu xi vulavurile, ndzi xi twile ko tala xi ku: “Hi mina ndzi nga ni matimba!”

¹² We N'wini wa hina, hina hi ri, na rona rirhandzu u na rona; munhu un'wana ni un'wana u n'wi tlherisela leswi ringaneke mintirho ya yena.