Pisalema 61 - BIBELE Mahungu Lamanene

Xikwembu i khokholo ra lava va xi tshembaka

Risimu ra Muyimbelerisi, leri hlaveleriwaka hi swipendana. Pisalema ya Davhida.

¹ We Xikwembu, yingisa ku huwelela ka mina, u amukela ku khongela ka mina.

² Ndza ku vitana ndzi ri emakun'wini ya misava, hikuva mbilu ya mina yi herile ntamu. Ndzi fikise ekhokholweni leri ndzi nga ta hlayiseka eka rona,

³ hikuva hi wena muhlayisi wa mina, u xihondzo xa mina lexi tsandzaka valala.

⁴ Ndzi navela ku tshama endlwini ya wena hilaha ku nga heriki, ndzi tumbela ehansi ka timpapa ta wena.

⁵ We Xikwembu, u yingisile xikombelo xa mina, hikuva u ndzi nyikile ndzhaka, va nga vanhu lava chavaka vito ra wena.

⁶ Andzisela mufumi wa tiko masiku ya yena ya ku hanya, a a hanye malembe layo tala.

⁷ A a fume hilaha ku nga heriki emahlweni ka wena, we Xikwembu; n'wi hlayise hi rirhandzu ra wena ni ku tshembeka ka wena.

⁸ Siku rin'wana ni rin'wana ndzi ta yimbelela ndzi dzunisa vito ra wena; ndzi ta ku humesela magandzelo lawa ndzi ku tshembiseke wona hi ku hlambanya.