Pisalema 60 - BIBELE Mahungu Lamanene

Xikhongelo xa munhu loyi a nga maxangwini

Risimu ra Muyimbelerisi ra xitsundzuxo, leri hlaveleriwaka hi switende. Xitlhokovetselo xa Davhida xo letela ha xona, xa nkarhi lowu a nga lwa ni Vasiriya va le Mesopotamiya ni va le Soba. Loko va vuya, Yowabu ú hlaserile vanhu va le Edomu va 12 000, eka Nkova wa Munyu.

¹ We Xikwembu, u hi cukumetile, u hi hangalasile, hikuva a wu hlundzukile, kambe sweswi, tlhela u hi pfuxa.

² U tsekatsekisile misava yi kondza yi handzuka, kutani sweswi pfala timfa ta yona, hikuva a ya ha tiyanga.

³ Vanhu va wena u va kombile maxangu. U hi sindzisile ku nwa vhinyo leyo bava leyi yi hi dedelekisaka.

⁴ We HOSI, hlengeleta vanhu lava va ku chavaka ehansi ka mujeko wa wena, leswaku va ta pona miseve ya valala.

⁵ Hi ponise hi matimba ya wena u hi hlamula, kutani hina varhandziwa va wena hi ta hlayiseka.

⁶ Xikwembu xi vulavula xi ri eTempeleni ya xona, xi ku: “Ndzi muhluri, kutani ndzi ta pandzelela muti wa Xikeme, ndzi avela vanhu rivala ra Sukoti.

⁷ Va le Giliyadi i va mina, hambi va ri va ka Manase i va mina. Xihuku xa mina hi vona va ka Efrayimi, va ka Yuda vona i nhonga ya mina ya vuhosi.

⁸ Tiko ra Mowabu i xibya ntsena lexi ndzi xi tirhisaka; va le Edomu va fumiwa hi mina; ndzi hlurile Vafilista, kutani ndzi le ku giyeni.”

⁹ Xana i mani la nga ta ndzi yisa le Edomu, a ndzi nghenisa ekhokholweni ra kona,

¹⁰ loko ku nga ri wena Xikwembu! Kasi u hi tshikile, mavuthu ya hina a wa ha fambi na wona enyimpini!

¹¹ Hi pfune u hi lamulela eka valala, hikuva vanhu va misava leyi va nge hi ponisi.

¹² Xikwembu xi ta yima na hina, kutani hi ta hlula, hi xona xi nga ta kandziyela valala va hina.