Pisalema 59 - BIBELE Mahungu Lamanene

Xikhongelo xo kombela ku sirheleriwa

Risimu ra Muyimbelerisi, hi mayimbelele ya risimu leri nge “U nga tshuki u swi herisa”. Xitlhokovetselo xa Davhida, enkarhini lowu Sawulo a nga rhuma vanhu ku ya rhendzela yindlu ya yena leswaku va ta n'wi dlaya.

¹ We Xikwembu xanga, ndzi lamulele eka valala va mina, ndzi sirhelele eka lava va ndzi hlaselaka,

² ndzi lwele eka lava endlaka leswo homboloka, u ndzi kutsula eka lava tsakelaka ku halata ngati.

³ Languta we HOSI, va ndzi tumbelela va lava ku ndzi dlaya, vanhu lava va tihanyi va ndzi xiyaxiya va lwa na mina; mina a ndzi tlulanga milawu, a ndzi dyohanga nchumu,

⁴ kambe va ndzi tela hi ku tsutsuma va hlomile matlhari, hambi ndzi nga onhanga nchumu. Tana u ta languta, u ndzi pfuna!

⁵ Wena HOSI Xikwembu xa matimba hinkwawo, wena Xikwembu xa Vaisraele, tana u ta ba vamatiko lava hinkwavo, u nga tsetseleli na un'we wa vakanganyisi lava!

⁶ Masiku hinkwawo va vuya nimadyambu va ri karhi va vukula kukota timbyana, va rhendzeleka hi muti.

⁷ Twana! Milomo ya vona yi humesa nhlambha ntsena, marito ya vona ma tlhava kukota tlhari, va ehleketa leswaku ku hava loyi a nga va twaka.

⁸ Kambe we HOSI Xikwembu, vanhu vo tano wa va hleka, u hlekula vamatiko lava hinkwavo.

⁹ Wena u ndzi nyikaka matimba, ndzi ta languta eka wena, hikuva we Xikwembu u khokholo ra mina.

¹⁰ Xikwembu xa mina xa tshembeka, xi ta ta laha ndzi nga kona, xi ta ndzi komba ku hluriwa ka valala va mina.

¹¹ We N'wini wa hina, wena xitlhangu xa hina, u nga va dlayeli makumu, kambe wo va tsongahata hi matimba ya wena va pepetseka ni matiko, vanhu va ka hina va ta ka va nga swi rivali.

¹² Loko va vulavula, marito ya vona ma ku dyohela; a va phasiwe hi ku tikukumuxa ka vona, hikuva va tiva ntsena ku rhukana ni ku hemba.

¹³ Eku hlundzukeni ka wena, va herise u va herisela makumu. A swi tiviwe ni le makun'wini ya misava leswaku va ka Yakobo va fumiwa hi wena we Xikwembu.

¹⁴ Masiku hinkwawo va vuya nimadyambu va ri karhi va vukula kukota timbyana, va rhendzeleka hi muti.

¹⁵ Va yinga-yinga va lava swakudya, kutani loko va nga swi kumi, va sungula ku vovola.

¹⁶ Kambe mina ndzi ta yimbelela ndzi dzunisa matimba ya wena, ndzi ta twarisa rirhandzu ra wena ka ha ri mixo, hikuva u vile khokholo ra mina laha ndzi tsutsumeleke kona hi nkarhi wa khombo.

¹⁷ Wena u ndzi nyikaka matimba ndzi ta ku dzunisa hi ku yimbelela, hikuva we Xikwembu u khokholo ra mina, u Xikwembu xo tshembeka lexi xi ndzi rhandzaka.