Pisalema 58 - BIBELE Mahungu Lamanene

Xikhongelo xo kombela leswaku lavo homboloka va biwa

Risimu ra Muyimbelerisi, hi mayimbelele ya risimu leri nge “U nga tshuki u swi herisa”. Xitlhokovetselo xa Davhida.

¹ N'wina varhangeri, xana hakunene mi avanyisa hi ku lulama xana? Xana mi avanyisela vanhu timhaka ta vona hilaha swi fanelaka hakona xana?

² E-e! Mi ehleketa ntsena ku endla leswo biha, mi rhandza ku pfuxa tinyimpi laha misaveni.

³ Lavo homboloka va dyohile va ha ku velekiwa, vahembi valavo va lahlekile ku sukela evuhlangini bya vona.

⁴ Va ni vuxungu ku fana ni nyoka, va fana ni mhiri yo fa tindleve,

⁵ leyi nga yingisiki ku yimbelela ka n'wini wa yona lowa mungoma, hambiloko mungoma loyi a ri nsini exikarhi ka vangoma-kulobye.

⁶ We Xikwembu, tshovelela meno ya tinghalanyana leti, fayetela tinhlaya ta tona we HOSI.

⁷ A va dzudzeke va nyamalala ku fana ni mberha, a va kandziyeriwe hansi va vuna kukota byanyi.

⁸ A va fambe ku fana ni humba leyi siyaka ritshepu ntsena; a va nyamalale kukota n'wana la velekiweke a file.

⁹ Loko va nga si tiva nchumu, va tsuvule ku fana ni mahlampfu ya mitwa, u va hisa hi vukari bya wena va ha hanya.

¹⁰ Munhu wo lulama ú ta tsaka loko a vona ku biwa ka lavo homboloka, ú ta hlamba milenge engatini ya vona.

¹¹ Vanhu va ta vula va ku: “Lavo lulama va vuyeriwa hakunene, Xikwembu lexi avanyisaka misava, xi kona!”