Pisalema 57 - BIBELE Mahungu Lamanene

Xikhongelo xo kombela ku lamuleriwa eka valala

Risimu ra Muyimbelerisi, hi mayimbelele ya risimu leri nge “U nga tshuki u swi herisa”. Xitlhokovetselo xa Davhida siku leri a nga balekela Sawulo a ya tumbela ebakweni.

¹ We Xikwembu ndzi twele vusiwana, ndzi ri ndzi twele vusiwana, hikuva hi wena khokholo ranga; ndzi ta tumbela ehansi ka timpapa ta wena xidzedze lexi onhaka xi kondza xi hundza.

² Ndzi huwelela eka Xikwembu xa le henhla-henhla, hikuva i Xikwembu lexi hetisaka makungu ya xona evutomini bya mina.

³ Xi ta ndzi hlamula xi ri etilweni, xi ndzi ponisa, lava va ndzi kandziyelaka, xi ta va fularhela. Xikwembu xi ta ndzi komba rirhandzu ra xona, ni ku tshembeka ka xona.

⁴ Ndzi etlela exikarhi ka tinghala, va nga vanhu lava mitetelaka van'wana; milomo ya vona i matlhari ni miseve, marito ya vona ma kariha onge i mikwana leyi lotiweke.

⁵ We Xikwembu, komba vukulu bya wena ehenhla matilweni, ku dzuneka ka wena a ku tate misava hinkwayo.

⁶ Valala va mina va ndzi rhiyele ntlhamu, kambe ndzi wu wachukisile! Endleleni ya mina va cerile khele, kambe lava nga wela eka rona hi vona vinyi!

⁷ We Xikwembu, ndzi tiyisiwile nhlana, ndzi tiyile hakunene! Hikokwalaho, ndzi ta suma risimu ndzi yimbelela:

⁸ Pfuka wena moya wanga, we haripa na we xitende, pfukani! Vurhonga ndzi ta byi pfuxa.

⁹ We N'wini wanga, ndzi ta ku nkhensa exikarhi ka matiko, ndzi ta yimbelela ndzi ku dzunisa exikarhi ka vanhu va tinxaka-xaka,

¹⁰ hikuva rirhandzu ra wena i rikulu, ri dliva ni le tilweni, ku tshembeka ka wena ku ringana ni mapapa hi ku tlakuka.

¹¹ We Xikwembu, komba vukulu bya wena ehenhla tilweni, ku dzuneka ka wena a ku tate misava hinkwayo.