Pisalema 56 - BIBELE Mahungu Lamanene

Xikhongelo xa munhu loyi a tshembaka Xikwembu ntsena

Risimu ra Muyimbelerisi, hi mayimbelele ya risimu leri nge “Tuva leri twalaka emirhini leyikulu ya le kule”. Xitlhokovetselo xa Davhida, enkarhini lowu a khomiweke hi Vafilista emutini wa Gati.

¹ We Xikwembu, ndzi twele vusiwana, hikuva vanhu va ndzi kandziyela hansi, siku hinkwaro valala va le ku ndzi xaniseni.

² Valala va mina va le ku ndzi kandziyeleni minkarhi hinkwayo, va tele lava tikurisaka va lwa na mina.

³ Loko ndzi khomiwa hi ku chava, ndzi titshembela wena ntsena.

⁴ Ndzi dzunisa Xikwembu hikwalaho ka switshembiso swa xona, ndzi tshemba xona, a ndzi chavi nchumu. Munhu a nga ndzi endla yini xana?

⁵ Siku hinkwaro valala va le ku lukeni ka mano yo ndzi vavisa, miehleketo ya vona hinkwayo i ya ku lwa na mina.

⁶ Va ndzi tumbelela, va ndzi sala ndzhaku, va xiyaxiya leswi ndzi swi endlaka, hikuva makungu ya vona i ku ndzi dlaya.

⁷ We Xikwembu, xana vanhu lavo biha lava va nga pona xana? Va herise hi vukari bya wena!

⁸ Maxangu ya mina u ma tivile we HOSI, u hlengeletile mihloti ya mina exibyeni. Xana swilo leswi a wu swi tsalanga ebukwini ya wena xana?

⁹ Siku ndzi nga ta huwelela eka wena, valala va mina va ta tlhelela endzhaku, hikuva ndza swi tiva leswaku wena Xikwembu u yima na mina.

¹⁰ Ndzi dzunisa HOSI Xikwembu hikwalaho ka rito ra xona,

¹¹ ndzi tshemba xona, a ndzi chavi nchumu. Xana munhu wa misava leyi a nga ndzi endla yini xana?

¹² We Xikwembu, ndzi rhandza ku hetisisa leswi ndzi tiboheke eka wena ku swi endla: Ndzi ta ku humesela magandzelo ya ku nkhensa,

¹³ hikuva u ndzi ntshunxile ematimbeni ya rifu, a wu pfumelanga leswaku ndzi rheta ndzi wa, u ndzi fambisile emahlweni ka wena we Xikwembu, eku vonakaleni loku nyikaka vutomi.