Pisalema 55 - BIBELE Mahungu Lamanene

Xikhongelo xa munhu loyi a xengiweke hi nakulobye

Risimu ra Muyimbelerisi, leri hlaveleriwaka hi swipendana. Swiletelo swa Davhida.

¹ We Xikwembu, rhiya ndleve u yingisa xikhongelo xa mina; loko ndzi ku kombela, u nga ndzi fularheli.

² Hundzulukela eka mina, u ndzi hlamula, hikuva maxangu ya mina ma ndzi tshikelela.

³ Huwa ya valala va mina yi ndzi pfumata vurhongo, ni ku tshimbeteriwa hi lavo biha, swa ndzi tika, hikuva va ndzi vangela nhlomulo; loko va hlundzukile, va tsakela ku lwa na mina.

⁴ Mbilu ya mina yi ba hi ku hatlisa, hikuva ndzi tshukisiwa hi rifu.

⁵ Nchavo ni ku rhurhumela swi ndzi rhendzerile, ndzi wele hi leswi chavisaka.

⁶ Kutani ndzi ri: “Mawaku loko a ndzo va ni timpapa ku fana ni tuva, a ndzi ta haha ndzi ya wisa ekule;

⁷ a ndzi ta baleka, ndzi ya tirhendzelekela kule emananga;

⁸ a ndzi ta hatla ndzi tilavela ntsonga laha ndzi nga tumbelaka kona xidzedze xa vukari bya wena.”

⁹ We N'wini wanga, pfilunganya ku vulavula ka vona, leswaku va nga ha twanani!

¹⁰ Ndzi vona tinyimpi ni madzolonga emutini, vusiku ni nhlekanhi swi rhendzeleka hi rirhangu ra wona, endzeni ka wona ku ni maxangu ni ku karhateka.

¹¹ Emutini ku lo tala marhumbi ntsena; ku xanisana ni vukanganyisi a swi suki etihubyeni ta kona.

¹² Loko a ndzo hlekula hi nala wa mina, a ndzi ta tiyisela; ni loko a ndzo kulela hi loyi a ndzi vengaka, a ndzi ta hambana na yena ndzi ya tumbela.

¹³ Kambe leswi, swi endla hi wena ntangha ya mina, we munghana wa mina wa xiviri.

¹⁴ Khale a hi dya kun'we mabulo yo tsakisa, hi famba-famba swin'we endlwini ya Xikwembu.

¹⁵ Rifu a ri va khubumete, a va rhelele va ya exivandleni xa vafi va ri karhi va hanya, hikuva leswo homboloka swi tele emitini ya vona ni le timbilwini ta vona.

¹⁶ Loko a ri mina, ndzi huwelela eka HOSI Xikwembu, kutani xona xi ta ndzi ponisa.

¹⁷ Vusiku ni nhlekanhi ndzi le ku vileleni, ndza rila, kutani xona xi ta ndzi yingisa;

¹⁸ xi ta ndzi lamulela enyimpini leyi ndzi yi lwaka, hikuva lava va ndzi hlaselaka, a hi ku tala ka vona!

¹⁹ Xikwembu xi ta ndzi twa, xi va tsongahata, hikuva a va hundzuki etindleleni ta vona, naswona a va chavi Xikwembu, xona xi tshameke exiluvelweni xa vuhosi.

²⁰ Loko a ri munghana wa mina, ú tlakuse voko a ba vanakulobye, a onha ntwanano exikarhi ka yena na vona.

²¹ Marito ya yena a ma tsokombela wonge i vulombe, kambe a a ehleketa ntsena ku pfuxa tinyimpi; ku vulavula ka yena a ku rhetela kukota mafurha, kambe embilwini a a hlome matlhari.

²² Andlala timhaka ta wena emahlweni ka HOSI Xikwembu, kutani xona xi ta ku seketela; xi nga ka xi nga pfumeli leswaku lowo lulama a tsekatsekisiwa, ni siku ni rin'we.

²³ We Xikwembu, u ta va hoxa ekheleni ra rifu; vanhu lava vo tsakela ku halata ngati ni ku kanganyisa, va ta hunguteriwa malembe ya vona ya ku hanya, kambe mina ndzi ta titshembela wena ntsena.