Pisalema 52 - BIBELE Mahungu Lamanene

Munhu la tshembaka rifuwo, ú ta herisiwa

Risimu ra Muyimbelerisi. Swiletelo swa Davhida, leswi a swi vuleke siku Dowege lowa Muedomu a teke a ta byela Sawulo a ku: “Davhida ú nghenile emutini wa Ahimeleke.”

¹ We nhenha, wo tidzunisa ntsena hi mintirho ya wena leyo biha, hikuva rirhandzu ra Xikwembu ri na mina masiku hinkwawo!

² We mukanganyisi, ririmi ra wena i mukwana lowo kariha, ri kanela makungu yo herisa van'wana.

³ U rhandza ngopfu leswo biha ku tlula leswinene, ku vulavula mavunwa u swi tsakela ku tlula ntiyiso.

⁴ Wena munhu wa ririmi ro kanganyisa, u tsakela marito hinkwawo lama onhaka.

⁵ Kambe Xikwembu xi ta ku herisela makumu, xi ta ku wisa, xi ku humesa emutini wa wena, xi ta ku tsuvula u suka etikweni ra lava hanyaka.

⁶ Lavo lulama va ta swi vona va tlhela va chava, kutani va ta ku hleka va ku:

⁷ “Vonani munhu loyi a nga ala leswaku Xikwembu xi va khokholo ra yena, hikuva a a tshemba ku tala ka rifuwo ra yena, a ehleketa leswaku ri nga n'wi biyelela.”

⁸ Kambe mina ndzi fana ni murhi wa mutlhwari lowu milaka endlwini ya Xikwembu: Minkarhi hinkwayo ndzi tshemba rirhandzu ra xona.

⁹ Ndzi ta ku nkhensa hilaha ku nga heriki we Xikwembu, hikuva u tirhile. Ndzi ta twarisa vito ra wena, hikuva ri lulamile emahlweni ka lava va ku khongelaka.