Pisalema 51 - BIBELE Mahungu Lamanene

Xikhongelo xo kombela ku rivaleriwa

Risimu ra Muyimbelerisi. Pisalema ya Davhida, leyi a yi yimbeleleke endzhaku ka loko muprofeta Natani a yile eka yena ku ya n'wi tshinya, hi leswi a a etlele na Batixeba.

¹ We Xikwembu, ndzi twele vusiwana hikwalaho ka rirhandzu ra wena; susa milandzu ya mina, hikwalaho ka tintswalo ta wena letikulu.

² Ndzi hlantswe swinene u ndzi basisa, u susa ku homboloka ka mina ni ku dyoha ka mina.

³ Milandzu ya mina, ndza yi tiva, ndzi tsundzuka swidyoho swa mina minkarhi hinkwayo.

⁴ Ndzi dyoherile wena, wena ntsena, ndzi endlile leswo biha emahlweni ka wena; hikokwalaho loko u ndzi avanyisa u ndzi ba, a wu nga vi na nandzu, u ta va u nga hoxanga.

⁵ Hakunene, ndzi velekiwile eku hombolokeni, ni mana wa mina ú ndzi tswarile eku dyoheni.

⁶ Wena u tsakelaka munhu la nga ni ntiyiso embilwini ya yena, ndzi dyondzise vutlhari exihundleni xa mina.

⁷ Ndzi xuve hi xitluka xa murhi wa hisopa, kutani ndzi ta va la tengeke, ndzi hlantswe, ndzi ta basa ku tlula ni gamboko.

⁸ Ndzi byele marito ya ntsako ni ku rhula, hambileswi u ndzi tshoveke swirho, sweswi ndzi tsakise.

⁹ Swidyoho swa mina u nga ha swi languti, susa ku homboloka ka mina hinkwako.

¹⁰ We Xikwembu, vumba endzeni ka mina mbilu leyo tenga, u tlhela u pfuxa moya wo lulama endzeni ka mina.

¹¹ U nga ndzi cukumeteli kule na wena, u nga ndzi tekeli Moya wa wena lowo kwetsima.

¹² Tlhela u ndzi nyika ntsako, wena Muponisi wanga, ndzi seketele, u pfuxa moya wa malwandla eka mina.

¹³ Ndzi ta dyondzisa vadyohi tindlela ta wena, lavo homboloka va ta tlhelela eka wena.

¹⁴ We Xikwembu, wena Muponisi wanga, ndzi humese enandzwini wa ngati leyi halatiweke, kutani ndzi ta yimbelela ndzi ku twarisa, wena Mukutsuri.

¹⁵ We N'wini wanga, pfula nomo wa mina, ndzi ta ku dzunisa ha wona.

¹⁶ Ku humeseriwa magandzelo a wu swi lavi; hambi ndzi nga ku hisela wona, ma nga ka ma nga ku tsakisi.

¹⁷ We Xikwembu, ganzelo leri u ri amukelaka i moya lowu vavisekeke; we Xikwembu, mbilu leyi tlhavekeke, leyi nga ni gome, a wu nga yi fularheli.

¹⁸ Hikwalaho ka tintswalo ta wena, katekisa muti wa Siyoni, u pfuxa rirhangu ra Yerusalema,

¹⁹ kutani magandzelo hinkwawo lamanene lama hisiwaka ma ta ku tsakisa, ni tinkuzi ti ta humesiwa ti yisiwa alitarini ya wena.