Pisalema 50 - BIBELE Mahungu Lamanene

Muavanyisi wa vanhu i Xikwembu

Pisalema ya Asafa.

¹ HOSI Xikwembu xa matimba hinkwawo xi vulavurile xi rhamba vanhu hinkwavo, ku sukela evuxeni ku ya fika evupeladyambu.

² Xikwembu xi komba ku vonakala ka xona lokukulu, xi ri emutini wo saseka ngopfu wa Siyoni.

³ Xikwembu xa hina xa ta, xi nga ka xi nga miyeli; xi rhangeriwe hi ndzilo lowu pfurhaka swinene, xi rhendzeriwa hi xidzedze lexo chavisa.

⁴ Xi vitana matilo ni misava leswaku swi ta va timbhoni ta xona, loko xi avanyisa vanhu va xona;

⁵ xi ri: “Ndzi hlengeleteleni lava va ndzi tshembaka, lava tiyiseke ntwanano wa mina na vona hi ku ndzi humesela magandzelo.”

⁶ Matilo ma twarisa ku lulama ka Xikwembu, hikuva hi xona xi nga muavanyisi!

⁷ HOSI Xikwembu xi ri: “N'wina vanhu va mina, ndzi lava ku vulavula na n'wina; ndzi lava ku mi tshinya n'wina Vaisraele. Mina Xikwembu, ndzi Xikwembu xa n'wina.

⁸ A ndzi mi tshinyi hikwalaho ka magandzelo ya n'wina, hikuva minkarhi hinkwayo mi ndzi hisela wona;

⁹ hambiswiritano, a ndzi boheki ku amukela tinkuzi to huma eka n'wina, kumbe swiphongho swa le matshangeni ya n'wina,

¹⁰ hikuva swiharhi hinkwaswo swa le nhoveni i swa mina, hi mina n'wini wa swifuwo hinkwaswo leswi dyaka emagangeni ya madzana-dzana.

¹¹ Ndzi tiva tinyanyana leti hanyaka etintshaveni, ni switsotso hinkwaswo swa le mananga.

¹² “Hambi a ndzo twa ndlala, a ndzi nga ta kombela nchumu eka n'wina, hikuva misava ni hinkwaswo leswi nga ka yona, i swa mina!

¹³ Xana ndza dya nyama ya tinkuzi, kumbe ku nwa ngati ya swiphongho xana?

¹⁴ Ndzi humeseleni magandzelo ya ku nkhensa, hi hetisisa leswi mi tiboheke ku ndzi endlela swona, mina la nge henhla-henhla.

¹⁵ Hi siku ra khombo, ndzi vitaneni, ndzi ta mi lamulela, kutani mi ta dzunisa vito ra mina.”

¹⁶ Kambe eka lavo homboloka, Xikwembu xi ri: “Milawu ya mina, mi yi hlayela yini, mi vulavulela yini hi ta ntwanano wa mina,

¹⁷ hikuva a mi lavi ku tshinyiwa, ni marito ya mina mi ma ba hi makatla!

¹⁸ Loko mi vona khamba, mi ri endla munghana, mi tolovelana ni lava endlaka vuoswi.

¹⁹ “Milomo ya n'wina, mi yi tirhisa ku vulavula leswo homboloka, tindzimi ta n'wina ti tele vukanganyisi.

²⁰ Mi tshama mi ri karhi mi hleva va ka n'wina, mi lumbeta vamakwenu.

²¹ Swilo leswi mi swi endlile, kambe mina a ndzi hlamulanga nchumu; mi ehleketile leswaku ndzi yima na n'wina, kambe sweswi ndza mi tshinya, ndzi mi vona nandzu.

²² N'wina mi ndzi rivaleke, yingisani leswi! Handle ka swona, ndzi ta mi handzulela, ku ri hava ni loyi a nga mi lamulelaka.

²³ Ku humesa minkhenso i gandzelo leri ri ndzi tsakisaka; loyi a fambaka etindleleni letinene, ndzi ta n'wi ponisa mina Xikwembu.”