Pisalema 5 - BIBELE Mahungu Lamanene

Xikhongelo xo kombela ku sirheleriwa

Risimu ra Muyimbelerisi, leri hlaveleriwaka hi switiringo. Pisalema ya Davhida.

¹ Rhiya ndleve, we HOSI, u twa leswi ndzi swi vulaka, u yingisa ku konya ka mina.

² Twana ku rila ka mina, wena Hosi yanga ni Xikwembu xanga, hikuva hi wena ndzi ku khongelaka.

³ Nimixo, wa ri twa rito ra mina, we HOSI; loko dyambu ri xa, ndzi ku vekela magandzelo hi ndlela ya kona, kutani ndzi langutela ...

⁴ Wena u Xikwembu lexi nga tsakeriki leswo homboloka, lowo biha a nga na ndhawu eka wena.

⁵ Lava tikurisaka a va amukeriwi emahlweni ka wena, vaendlaswivi hinkwavo wa va wenga.

⁶ We HOSI, u herisa lava vulavulaka mavunwa, lava halataka ngati ni lava kanganyisaka, wa va nyenya.

⁷ Kasi mina ndzi ta nghena endlwini ya wena, hikwalaho ka tintswalo ta wena leto tala; ndzi ta nkhinsama emahlweni ka Tempele ya wena leyo hlawuleka; ndzi ku khongela hi xichavo.

⁸ HOSI, leswi ndzi nga ni valala, ndzi fambise endleleni ya wena leyo lulama, u yi khulela yi basa emahlweni ka mina.

⁹ Leswi humaka emilon'wini ya vona a swi na ntiyiso, timbilu ta vona ti tele vumbabva; hambiloko va vulavula swo tsakisa vanhu, minkolo ya vona i masirha lama ahlameke.

¹⁰ We Xikwembu, va rhwexe milandzu ya vona, va tshike va lovisiwa hi makungu ya vona; va hlongole va suka emahlweni ka wena hikwalaho ka swidyoho swa vona leswo tala, hikuva va ku hundzukerile.

¹¹ Kambe hinkwavo lava tumbelaka eka wena va ta tsaka, va ba minkulungwana hilaha ku nga heriki; wena u ta va biyelela leswaku lava ku rhandzaka va kuma ntsako lowukulu eka wena.

¹² We HOSI, u katekisa munhu wo lulama, nsovo wa wena wu n'wi vhikela ku fana ni xitlhangu.