Pisalema 49 - BIBELE Mahungu Lamanene

La tshembaka rifuwo, a nga tlharihanga

Risimu ra Muyimbelerisi. Pisalema ya va ka Kore.

¹ N'wina hinkwenu vamatiko, twanani mhaka leyi, rhiyani ndleve, n'wina hinkwenu mi akeke emisaveni,

² ndzi vula n'wina tihosi na n'wina malandza, n'wina swigwili na n'wina swisiwana.

³ Ndzi lava ku vulavula marito ya vutlhari, ndzi anakanya leswi twalaka embilwini ya mina.

⁴ Ndzi ta yingisisa swivuriso swa tintlhari, ndzi hlamula swivutiso leswo tika hi ku chaya tiharipa.

⁵ Xana ndzi chavela yini siku ra khombo, ni ku homboloka ka lava va ndzi xanisaka xana?

⁶ Vanhu lava, va titshembela rifuwo ra vona, va tibumabuma hi ku tala ka rona.

⁷ Kambe munhu a nge swi koti ku tikutsula, hambi ku humesa mali a xava vutomi bya yena eka Xikwembu,

⁸ hikuva nxavo wa vutomi wu le henhla ngopfu, vanhu va nge wu koti ni siku ni rin'we;

⁹ munhu a nga ka a nga hanyi hilaha ku nga heriki, sirha, a nge ri papalati.

¹⁰ Vanhu va swi vona leswaku hambi ti ri tintlhari ta fa, ku fana ni leswi mintlunya ni swiphunta swi faka: Hinkwavo va siyela van'wana rifuwo ra vona.

¹¹ Hambileswi masimu va ma thyeke mavito ya vona, masirha ya vona ma ta hundzuka makaya ya vona laha va nga ta tshama kona hilaha ku nga heriki.

¹² Vanhu vo tshemba vukosi bya vona va nge tlhaveli hi dyambu, va ta herisiwa kukota swiharhi.

¹³ Leyi hi yona ndlela ya lavo titshemba ngopfu, lava tsakelaka rifuwo ra vona va ta herisa sweswo.

¹⁴ Va ta khayimeriwa exivandleni xa vafi kukota tinyimpfu, rifu ri va rona murisi wa vona; va ta rhelela esirheni, xiyimo xa vona xi ri karhi xi onhaka, va nga ha tshami etindlwini ta vuhosi.

¹⁵ Kambe mina, Xikwembu xi ta ndzi kutsula ematimbeni ya xivandla xa vafi, hakunene xi ta ndzi amukela.

¹⁶ Mi nga tshuki mi chavisiwa hi rifuwo ra munhu, hambiloko ku dzuneka ka muti wa yena ku ya ku ndlandlamuka, mi nga vileli,

¹⁷ hikuva siku a faka, a nge fambi na nchumu, rifuwo ra yena ri nge n'wi landzi esirheni.

¹⁸ Munhu loko a ha hanya, ú titwa a katekile, vanhu van'wana va n'wi dzunisa loko a humelela,

¹⁹ kambe na yena ú ta fa a landza va ka vona, laha a nga ta ka a nga ha voni dyambu.

²⁰ Vanhu vo tshemba vukosi bya vona a va twisisi nchumu, va ta herisiwa kukota swiharhi.