Pisalema 48 - BIBELE Mahungu Lamanene

Yerusalema i muti wa Xikwembu

Risimu. Pisalema ya va ka Kore.

¹ HOSI Xikwembu xa hina i Xikwembu lexikulukumba, xi dzuneka ngopfu emutini lowu wu nga wa xona, entshaveni ya xona leyo hlawuleka;

² xiyimo xa ntshava ya Siyoni a hi ku saseka ka xona, vanhu va misava hinkwayo va tsakela yona, hikuva muti wa Mufumi wa hinkwaswo wu le ka yona, hi yona “Ntshava-ya-le-N'walungwini”.

³ Xikwembu xi le ndzeni ka makhokholo ya yona, xi tiveka xi ri mulweri wa yona.

⁴ Vonani hilaha tihosi ti hlengeletaneke hakona, ti tela ku ta hlasela ntshava ya Siyoni;

⁵ kambe loko ti yi vona, ti hlamala swinene, ti chava, ti hangalaka,

⁶ ti ri karhi ti rhurhumela, ni ku vaviseka kukota wansati loko a veleka,

⁷ kumbe tingalava ta le Tarxixi loko ti fayeteriwa hi bubutsa ra le vuxeni.

⁸ Leswi hi tshamaka hi byeriwa swona, sweswi hi swi vona hi mahlo swi humelela emutini wa HOSI ya matimba hinkwawo, wu nga muti wa Xikwembu xa hina lowu xi wu tiyiseke, wu va kona hilaha ku nga heriki.

⁹ We Xikwembu, hi anakanya hi vuntshwa rirhandzu ra wena lero tshembeka, hi ri eTempeleni ya wena.

¹⁰ Ku dzuneka ka wena ku tate misava, we Xikwembu; vito ra wena ri tiveka hinkwako. U tirha hi ku lulama ntsena.

¹¹ Hikokwalaho ntshava ya Siyoni a yi tsake; ku avanyisa ka wena a ku tsakise miti hinkwayo ya tiko ra Yuda.

¹² Famba-fambani, mi rhendzeleka ni muti wa Siyoni, mi hlaya ni swihondzo swa wona;

¹³ xiyaxiyani rirhangu ra wona, mi nghena ni le makhokholweni ya wona, mi ta kota ku hlayela vana va n'wina mi ku:

¹⁴ “Lexi hi xona Xikwembu, Xikwembu xa hina hilaha ku nga heriki; xi ta hi komba tindlela minkarhi hinkwayo.”