Pisalema 47 - BIBELE Mahungu Lamanene

Xikwembu xi fuma misava hinkwayo

Risimu ra Muyimbelerisi. Pisalema ya va ka Kore.

¹ N'wina hinkwenu vamatiko, phokotelani! Banani nkulungwana mi twarisa Xikwembu,

² hikuva HOSI Xikwembu xa le henhla-henhla xa chaviseka; xona i mufumi lonkulu ematikweni hinkwawo.

³ Xi sindzisa vamatiko ku va hansi ka hina, xi va tsongahata leswaku hi va fuma.

⁴ Tiko leri nga ndzhaka ya hina, leri hi tidzunisaka ha rona, hi xona xi nga hi hlawulela rona, hikuva xa hi rhandza hina va ka Yakobo.

⁵ HOSI Xikwembu xi tlhandlukele eSiyoni, vanhu va ri karhi va ba huwa ya ntsako, va chaya ni tinanga.

⁶ Dzunisani Xikwembu hi tinsimu, yimbelelani mi twarisa mufumi wa n'wina,

⁷ hikuva hi yena la fumaka misava hinkwayo; hikokwalaho, n'wi dzuniseni hi tipisalema!

⁸ Xikwembu xi fuma vamatiko, xi tshamile exiluvelweni xa xona lexo hlawuleka.

⁹ Tindhuna ta vamatiko ti ta endhawini yin'we, kutani ti hundzuka vanhu va Xikwembu xa Abrahama, hikuva vafumi va laha misaveni va le hansi ka xona. Xikwembu i xikulu ku tlula swilo hinkwaswo.