Pisalema 46 - BIBELE Mahungu Lamanene

HOSI ya matimba hinkwawo yi na hina

Risimu ra Muyimbelerisi, leri sumeriwaka ehenhla. Pisalema ya va ka Kore.

¹ Xikwembu i khokholo ra hina leri tiyeke; vanhu lava nga khombyeni, xi hatla xi va pfuna.

² Hikokwalaho hi nga ka hi nga rhurhumeli, hambiloko misava yi nga hundzuka, kumbe tintshava ti ninginika ti wela elwandle;

³ hambiloko magandlati ma pfuma ma phupha ni khuvi, ni loko tintshava ti tsekatseka hi ku kariha ka wona, hi nga ka hi nga chavi.

⁴ Ku ni nambu lowu khulukaka wu tisaka ntsako emutini wa Xikwembu; muti lowu i ndhawu ya Loyi a nge henhla-henhla, wu hlawulekile ku tlula tindhawu hinkwato.

⁵ Xikwembu xi le mutini wa kona, a ku na loyi a nga wu ninginisaka, hikuva Xikwembu xi ta wu sirhelela ka ha ri mpundzu.

⁶ Matiko ma ba huwa, mimfumo yi tlula-tlula, kambe loko Xikwembu xi tlakusa rito, misava ya n'oka.

⁷ HOSI ya matimba hinkwawo yi na hina, khokholo ra hina i Xikwembu xa va ka Yakobo.

⁸ Tanani mi ta hlalela mintirho ya HOSI Xikwembu! Xi endlile swilo leswo hlamarisa laha misaveni:

⁹ Xi siverile tinyimpi ku ya fika evugimamusi, vurha xi tshovile, xi bvinyile ni matlhari; makalichi ya nyimpi xi ma hisile!

¹⁰ Xikwembu xi ri: “Tshikani matlhari! Swi tiveni leswaku hi mina Xikwembu. Ndzi le henhla ka vanhu hinkwavo, misava hinkwayo yi fuma hi mina.”

¹¹ HOSI ya matimba hinkwawo yi na hina, khokholo ra hina i Xikwembu xa va ka Yakobo.