Pisalema 45 - BIBELE Mahungu Lamanene

Risimu ro tlangela nkhuvo wa vukati entsindza

Risimu ra Muyimbelerisi, leri hlaveleriwaka hi switende. Swiletelo swa va ka Kore; risimu ra rirhandzu.

¹ Mbilu ya mina yi tala hi marito yo saseka swinene, kutani ndzi suma risimu ro dzunisa mufumi wa tiko; ririmi ra mina ri rhetela ku fana ni voko ra mutsari la tivaka ntirho wa yena.

² Exikarhi ka majaha, ku hava loyi a ku tlulaka hi ku saseka, loko u vulavula, tintswalo to khuluka kunene; hakunene Xikwembu xa ku katekisa minkarhi hinkwayo.

³ We nhenha, khweketa fumu ra wena enyongeni, hikuva wa dzuneka naswona wa chaviseka.

⁴ Eku chavisekeni ka wena u ta humelela; famba u ya yimela ntiyiso, u avanyisa hi musa ni ku lulama; voko ra wena ra xinene a ri ku pfune ku endla leswo hlamarisa.

⁵ We hosi, miseve ya wena yi tontswile, yi tlhava timbilu ta valala; vanhu va matiko va wela emilengeni ya wena.

⁶ We hosi, u fana ni Xikwembu, u ta fuma hilaha ku nga heriki, nhonga ya vuhosi bya wena yi ta tisa ku lulama.

⁷ U rhandza ku lulama, u venga ku homboloka, hikokwalaho Xikwembu, xona Xikwembu xa wena, xi ku chele mafurha enhlokweni hi siku ra nkhuvo, xi ku hlawula eka tihosi tin'wana.

⁸ Swiambalo swa wena hinkwaswo swi n'wan'waseriwile mirhi ya risuna ya mirha ni mhangana. Etindlwini leto saseka ta le ntsindza, ku twala mpfumawulo wa swichaya-chayani leswi swi ku tsakisaka.

⁹ Exikarhi ka vavasati va laha ntsindza ku ni vana va tihosi, evokweni ra wena ra xinene, ku yimile nkosikazi, a ambele vuhlalu bya nsuku lowo tenga.

¹⁰ Yingisa we mutekiwa, u twa leswi ndzi ku byelaka swona, rivala varikwenu ni ndyangu wa tata wa wena.

¹¹ Ku saseka ka wena a ku yive mbilu ya hosi; titsongahate emahlweni ka yona, hikuva i n'wini wa wena.

¹² We nhwana wa le Tiri, lava fuweke etikweni va ta ku humesela tinyiko, va endlela leswaku u va tsakela.

¹³ Mutekiwa n'wana hosi ú sasekile ngopfu! Ú nghena entsindza a ambarile xiambalo xo rhungeleriwa nsuku;

¹⁴ ú yisiwa eka hosi a hakarile minceka ya mavalavala, a landziwa hi vanhwana-kulobye, ti nga tinxangwana ta yena, va nghena hinkwavo.

¹⁵ Va hlanganisiwa hi minkulungwana, va ri karhi va nghena etindlwini ta le ntsindza.

¹⁶ We hosi, vana va wena va ta tshama exiluvelweni xa vatata wa wena, u ta va veka tindhuna etikweni hinkwaro.

¹⁷ Vito ra wena ndzi ta ri dzunisa evanhwini minkarhi hinkwayo, kutani vanhu va matiko hinkwawo va ta ku twarisa hilaha ku nga heriki.