Pisalema 44 - BIBELE Mahungu Lamanene

Xikhongelo xo kombela ku sirheleriwa

Risimu ra Muyimbelerisi. Swiletelo swa va ka Kore.

¹ We Xikwembu, vatata wa hina va hi byerile leswi u swi endleke khale eminkarhini ya vona, hi swi twile hi tindleve ta hina:

² Hi wena hi xiviri xa wena u hlongoleke vamatiko, kambe vanhu va wena, u va nyikile vutshamo; u bile vamatiko, kambe vanhu va wena, u va katekisile.

³ Vatatana va hlurile valala va va tekela tiko, kambe ku nga ri hi matimba ya vona ni matlhari ya vona; va ri kumile hi matimba ya wena lamakulu, hikuva a wu ri kusuhi na vona, u va komba leswaku wa va tsakela.

⁴ Hi wena Mufumi wanga ni Xikwembu xanga, hi wena u lerisaka leswaku va ka Yakobo va hlula.

⁵ Valala va hina, hi va wisela hansi hi ku pfuniwa hi wena, hi va kandziyela hi vito ra wena,

⁶ vurha bya mina kumbe fumu ra mina a ndzi swi tshembi, hikuva a hi swona swi nga ndzi ponisaka.

⁷ Hi wena u hi poniseke emavokweni ya valala va hina, lava va hi vengaka, u va hlanganisa tinhloko.

⁸ We Xikwembu, minkarhi hinkwayo hi ta tinyungubyisa hi wena; vito ra wena hi ta ri twarisa hilaha ku nga heriki.

⁹ Hambiswiritano, u hi tshikile u hi khomisa tingana, mavuthu ya hina a wu yanga na wona enyimpini.

¹⁰ U hi tshikile hi hluriwa hi valala va hina, va phangha ni rifuwo ra hina.

¹¹ U hi khayimile kukota tinyimpfu leti yaka eku tlhaviweni, u hi hangalasa ni matiko.

¹² U xavisile vanhu va wena hi nxavo wa le hansi, u nga lavi ku vuyeriwa hi nchumu!

¹³ U hi sorisile hi vaakelani va hina, va hi hlekula ni ku hi sandza.

¹⁴ U hi hundzurile xihlambanyiso exikarhi ka vanhu, loko va hi vona, va hlakahla tinhloko.

¹⁵ Siku hinkwaro ndzi khomiwa hi tingana, ti vonaka exikandzeni xa mina,

¹⁶ hikuva ndzi twa vasandzi va ri karhi va rhuketela emahlweni ka valala ni ka lava tsakelaka ku tirihisela.

¹⁷ Hinkwaswo leswi swi hi humelerile, hambiloko hi nga ku rivalanga kumbe ku tshova ntwanano wa wena.

¹⁸ A hi tlhelelanga ndzhaku, naswona a hi hambukanga etindleleni ta wena.

¹⁹ Hambiswiritano u hlaserile tiko ra hina ri hundzuka ndhawu ya timhungubye, u ri funengeta hi xinyami xo chavisa.

²⁰ We Xikwembu xa hina, loko hi rivele vito ra wena kumbe loko hi tlakusile mavoko hi khongela Xikwembu xin'wana,

²¹ xana a wu nga ta swi tiva xana, leswi u tivaka swihundla swa le mbilwini ya munhu?

²² Masiku hinkwawo, va ka hina va dlayiwa hikwalaho ka wena, va fanisiwa ni tinyimpfu leti yaka eku tlhaviweni.

²³ We N'wini wa hina, suka u yima, u nga etleri! Phaphama, u nga hi cukumeteli makumu.

²⁴ Hikwalaho ka yini u tisiva mahlo xana? Xana u rivalela yini mahlomulo ni ku xanisiwa ka hina?

²⁵ Hi biwile hi wiseriwa hansi, hi lo nhàvàlàlà, eritshurini.

²⁶ Suka u yima u hi lamulela! Hi kutsule hikwalaho ka rirhandzu ra wena lero tshembeka.