Pisalema 42 - BIBELE Mahungu Lamanene

Xiyenge xa vumbirhi (Tipisalema 42 – 72) Ku rilela Xikwembu

Risimu ra Muyimbelerisi. Swiletelo swa va ka Kore.

¹ Ku fana ni ntswele ya mhunti loko yi rilela nambu lowu khulukaka, hi sweswo ni moya wanga, wu rilela wena Xikwembu xanga.

² Moya wanga wu twa torha ra Xikwembu, ra Xikwembu lexi hanyaka. Xana ndzi ta nghena rini eTempeleni ya xona, ndzi ya yima emahlweni ka xona xana?

³ Mihloti i swakudya swa mina vusiku ni nhlekanhi, hikuva va tshamela ku ndzi vutisa va ku: “Xana Xikwembu xa wena xi kwihi ke?”

⁴ Loko ndzi ri karhi ndzi phofula swa moya wanga, ndzi tsundzuka swa khale, hilaha a ndzi longoloka hakona ni lavakulu, hi ya endlwini ya Xikwembu, hi ri karhi hi ba minkulungwana ya ntsako ni ku yimbelela tinsimu ta minkhenso hi ri emintshungwini leyi dyaka nkhuvo.

⁵ We moya wanga, u tlhavekela yini xana? U vavisekela yini endzeni ka mina ke? Tshemba Xikwembu! Mina ndza ha ta xi dzunisa, xona Xikwembu xanga, muponisi wanga wa xiviri.

⁶ We HOSI, moya wanga wa tlhaveka endzeni ka mina, hikokwalaho ndza ku anakanya ndzi ri etikweni ra le Yordani ni ra Hermoni, ni le ntshaveni ya Mizara.

⁷ Maxangu ya mina ma landzelelana kukota magandlati, u ma pfumisa wonge i maboboma; magandlati ya wena ni maboboma ya wena hinkwawo ma hundzile hi le henhla ka mina.

⁸ Hambiswiritano, HOSI Xikwembu xi ta ndzi komba tintswalo loko ri xile, nivusiku ndzi ta yimbelela risimu ra xona, ndzi khongela xona n'wini wa vutomi byanga.

⁹ Ndzi ta vutisa Xikwembu, ribye ra mina, ndzi ku: “U ndzi tshikele yini? Hikwalaho ka yini ndzi famba tanihi muferiwa, ndzi ri karhi ndzi xanisiwa hi valala va mina xana?”

¹⁰ Ndzi titwa ndzi tshoveke swirho, loko valala va mina va ndzi rhukana, ni loko va tshamela ku ndzi vutisa va ku: “Xana Xikwembu xa wena xi kwihi ke?”

¹¹ We moya wanga, ú tlhavekela yini xana? U vavisekela yini endzeni ka mina ke? Tshemba Xikwembu! Mina ndza ha ta xi dzunisa, xona Xikwembu xanga, muponisi wanga wa xiviri.