Pisalema 41 - BIBELE Mahungu Lamanene

Xikhongelo xa loyi a kombelaka ku hanyisiwa

Risimu ra Muyimbelerisi. Pisalema ya Davhida.

¹ Ku katekile munhu loyi a anakanyaka swisiwana; siku a welaka ekhombyeni, HOSI Xikwembu xa n'wi lamulela,

² xi n'wi hlayisa ni ku n'wi nyika vutomi, xi n'wi katekisa emisaveni, a xi n'wi tshiki a wela emavokweni ya valala va yena.

³ HOSI Xikwembu xa n'wi tiyisa loko a vabya, loko a ri esangwini ra vuvabyi, xa n'wi ongola.

⁴ Mina ndzi te: “We HOSI, ndzi twele vusiwana, u ndzi horisa, hambileswi ndzi ku dyoheleke.”

⁵ Valala va mina va luka mano va ku: “Xana ú ta fa rini munhu loyi, hi ta ka hi nga ha vulavuli hi yena!”

⁶ Loko un'wana a ta ku ta ndzi pfuxela, wo tela ku ta ndzi koya ntsena, a ri karhi a xopa-xopa leswi a nga ta ndzi onha vito ha swona loko a humile.

⁷ Hinkwavo lava va ndzi vengaka, va hlengeletana va ndzi hleva, va ndzi navelela swo biha,

⁸ va ku: “Khote, hambi kona! Leswi a etleleke, onge ú ta pfuka!”

⁹ Hambi a ri munghana wa mina loyi a ndzi n'wi tshemba, loyi a ndzi dya na yena, sweswi ú lwa na mina.

¹⁰ Kambe we HOSI, ndzi twele vusiwana, u ndzi pfuxa, leswaku ndzi ya tirihisela eka vona.

¹¹ Loko valala va mina va tshika ku khana, ndzi ta tiva leswaku wa ha ndzi tsakela.

¹² U ta ndzi seketela, hikuva a ndzi na nandzu, kutani u ta ndzi hlayisa kusuhi na wena hilaha ku nga heriki.

¹³ A ku nkhensiwe HOSI Xikwembu xa Israele, sweswi ni hilaha ku nga heriki. Amen! Amen!