Pisalema 40 - BIBELE Mahungu Lamanene

Ku nkhensa ni ku tshemba Xikwembu

Risimu ra Muyimbelerisi. Pisalema ya Davhida.

¹ Ndzi languterile HOSI Xikwembu ndzi nga heli mbilu, kutani xi tshinerile kusuhi xi ta yingisa ku huwelela ka mina.

² Xi ndzi humesile ekheleni leri chavisaka, endzhopeni leyi dlayaka; xi ndzi yimisile ehenhla ka ribye, xi ndzi basisela tindlela.

³ Enon'weni wa mina xi nghenisile risimu lerintshwa leri dzunisaka xona Xikwembu xa hina; vanhu lavo tala va ta swi vona, kutani va ta chava, va sungula ku tshemba HOSI Xikwembu.

⁴ Ku katekile munhu loyi a tshembaka HOSI Xikwembu, loyi a nga twananiki ni lava tikurisaka, a hambana ni lava landzelelaka swikwembu swa hava.

⁵ We HOSI Xikwembu xanga, u andzisile mintirho ya wena leyo hlamarisa, ni makungu ya wena ehenhla ka hina. Ku hava munhu loyi a nga ringanisiwaka na wena, mintirho ya wena ndzi nge yi vuli hinkwayo, i ntsandza-vahlayi!

⁶ Wena a wu lavi timhamba ni magandzelo, kambe u ndzi nyika tindleve leti twaka; magandzelo lama hisiwaka ni timhamba to susa swidyoho a wu swi tsakeli.

⁷ Kutani ndzi ri: “Vona, hi mina loyi! Ebukwini ya Nawu ku tsariwile leswi swi ndzi khumbaka.

⁸ We Xikwembu xanga, ndzi tsakela ngopfu ku endla ku rhandza ka wena, nawu wa wena wu le mbilwini ya mina.”

⁹ Ntshungu lowukulu ndzi wu tivisile mahungu yo tsakisa ya leswaku u hi ntshunxile; We HOSI, wa swi tiva swinene leswaku a ndzi miyelanga.

¹⁰ Mhaka ya leswaku u hi ntshunxile, a ndzi yi endlanga xihundla, ndzi tivisile vanhu leswaku u muponisi la tshembekaka; ntshungu lowukulu a ndzi wu fihlelanga rirhandzu ni ku tshembeka ka wena.

¹¹ We HOSI, u nga tshiki ku ndzi komba tintswalo, ndzi funengete hi rirhandzu ni ku tshembeka ka wena.

¹² Ndzi rhendzeriwe hi makhombo layo tala ngopfu; swidyoho swa mina swi ndzi kumile swi ndzi pfale ni mahlo, swi tlula ni misisi ya mina hi ku tala, kutani ndzi hela matimba.

¹³ We HOSI, wa nga ndzi lamulela, hatlisa u ta ndzi pfuna we HOSI.

¹⁴ Lava ringetaka ku ndzi khoma va ndzi dlaya, va nyumise hinkwavo u va khomisa tingana; lava tsakaka loko ndzi ri ekhombyeni, va tlherise u va tsongahata.

¹⁵ Lava va ndzi hlekaka va ku: “Aháà! Aháà!” va chavise, u va khomisa tingana.

¹⁶ Hinkwavo lava taka eka wena, va tate hi ntsako; lava tsakelaka ntirho wa wena wa ku ponisa, a va hambe va ku: “HOSI Xikwembu i Xikwembu lexikulukumba!”

¹⁷ Hambileswi ndzi nga xisiwana, ndzi pfumalaka swa le mandleni, N'wini wanga a nga ndzi rivali. We Xikwembu xanga, u mupfuni ni muponisi wa mina, hatlisa u ta ndzi pfuna.