Pisalema 4 - BIBELE Mahungu Lamanene

Xikhongelo xa madyambu xa loyi a tshembaka Xikwembu

Risimu ra Muyimbelerisi, leri hlaveleriwaka hi swipendana. Pisalema ya Davhida.

¹ We Xikwembu, mulweri wa tifanelo ta mina, ndzi hlamule loko ndzi huwelela. U ndzi nyikile ko tumbeta nhloko, loko ndzi ri emaxangwini; sweswi ndzi twele vusiwana, u yingisa ku khongela ka mina.

² N'wina vanhu, xana mi ta sandza vumunhu bya mina ku fikela rini xana? Xana ku tsakela leswi nga pfuniki nchumu ni ku landzelela mavunwa, mi ta swi tshika rini xana?

³ Tivani leswaku HOSI yi tihlawulerile munhu loyi a yi khongelaka; loko ndzi huwelela eka yona HOSI, ya ndzi yingisa.

⁴ Karihani, kambe mi nga dyohi; vulavulani hi timbilu loko mi etlele emasangwini, mi miyerile!

⁵ Humesani magandzelo lama nga wona, mi veka ku tshemba ka n'wina eka HOSI.

⁶ Vanhu vo tala va ri: “Mawaku loko hi nga kuma minkateko! We HOSI, hi langute, u hi komba tintswalo!”

⁷ Kambe wena u engeterile ntsako embilwini yanga, wu tlula lowu va nga na wona loko va pfunile mavele ni vhinyo.

⁸ Ndzi ta tilata ndzi etlela hi ku rhula, hikuva hi wena ntsena, we HOSI, loyi u endlaka leswaku ndzi tshama ndzi hlayisekile.