Pisalema 39 - BIBELE Mahungu Lamanene

Munhu a nga hlweli ku hundza emisaveni

Risimu ra Muyimbelerisi, ra Yedutuni. Pisalema ya Davhida.

¹ Ndzi vurile ndzi ku: “Eku hanyeni ka mina, ndzi ta tivonela leswaku ndzi nga dyohi hi ku vulavula ka mina; loko lavo homboloka va ha ri kusuhi na mina, ndzi ta pfala nomo, ndzi ku whí!”

² Hikokwalaho, ndzi timiyelerile, ndzi nga vuli nchumu, kambe ku miyela loku a ku ndzi pfunanga nchumu: Ku karhateka ka mina ku yile ku nyanya,

³ mbilu ya mina a yi pfurha endzeni ka mina; eku konyeni ka mina a ndzi tshwa kunene, kutani eku heteleleni ndzi vulavurile ndzi ku:

⁴ “We HOSI, ndzi tivise leswaku ndzi ta hanya ku fikela rini, ndzi byele ntsengo wa malembe ya mina, leswaku ndzi ta tiva ku koma ka vutomi bya mina.

⁵ Vona! U ndzi pfumelela ku hanya masikunyana ntsena; emahlweni ka wena malembe ya mina a hi nchumu; hakunene munhu hambi o titwa a tiyile, i moyanyana ntsena.

⁶ Vanhu va ya hala ni hala, wonge i mindzhuti, va tikarhatela swa hava, va tihlengeletela swilo, va nga tivi leswaku swi ta va swa mani.

⁷ “Hikokwalaho, xana ndzi nga ha tshemba yini, we N'wini wanga? Hi wena ntsena loyi ndzi n'wi tshembaka.

⁸ Ndzi kutsule eku tiariseni ka mina hinkwako, u nga pfumeli leswaku swiphukuphuku swi tlanga hi mina.

⁹ Sweswi ndzi ta timiyelela, a ndzi nga ha pfuli nomo, hikuva ntirho lowu i wa wena.

¹⁰ U nga ha ndzi bi, hikuva nkhavi wa wena wa ndzi vavisa.

¹¹ U tshinya munhu ni ku n'wi bela swidyoho swa yena, kutani swilo leswi a swi tsakelaka, wena u swi herisa wonge swi lo dyiwa hi muhlwa. Hakunene munhu un'wana ni un'wana i moyanyana ntsena.

¹² “We HOSI, ndzi huwelela eka wena, rhiya ndleve u yingisa ku khongela ka mina, u nga tshiki ku ndzi pfuna loko ndzi ri eku rileni, hikuva eka wena ndzo va muhundzi wa ndlela, ndzi muluveri kukota vatata wa mina.

¹³ U nga ndzi swondzoloti, leswaku ndzi kota ku tsaka, ku nga si fika nkarhi wa mina wa ku rhurha, ndzi siya misava.”