Pisalema 38 - BIBELE Mahungu Lamanene

Ku tisola ka munhu la vabyaka

Pisalema ya Davhida, ya ku kombela ku tsundzukiwa hi Xikwembu.

¹ We HOSI, ndzi be u nga hlundzukanga, u ndzi tshinya u nga karihanga.

² Miseve ya wena yi ndzi tlhaveterile, u ndzi tshikelerile hi voko ra wena.

³ Ndzi twa ku vava emirini wa mina hinkwawo, vuvabyi byi ndzi pandzisa ni marhambu, hikuva ndzi tivangele vukari bya wena hi leswi ndzi dyoheke.

⁴ Milandzu ya mina yi tele ngopfu, ya ndzi khubumeta, yi hundzuka ndzhwalo lowu ndzi hlulekaka ku wu rhwala.

⁵ Swilondza swa mina swa nun'hwa swi huma vuvopfu, hikwalaho ka vuphukuphuku bya mina.

⁶ Ndzi tikeriwa ni ku tshikeleriwa ku tlula mpimo, siku hinkwaro ndzi famba-famba ndzi ri eku rileni.

⁷ Endzeni ka mina ku hisa ngopfu, ndzi twa ku vava emirini wa mina hinkwawo.

⁸ Matimba ya mina ma herile, a ndza ha koti nchumu, ndzi le ku konyeni, mbilu ya mina yi karhateka ngopfu.

⁹ We N'wini wanga, u tiva hinkwaswo leswi ndzi swi navelaka, ku konya ka mina, wa ku twa.

¹⁰ Mbilu ya mina yi ba hi ku hatlisa, ndzi hela ntamu, ni mahlo ya mina a ma ha voni.

¹¹ Vanghana va mina, vona lava ndzi va rhandzaka, va ndzi tshikile ekhombyeni, va ka hina na vona va ndzi fularhela.

¹² Lava va lavaka ku ndzi dlaya, va rhiya mintlhamu, lava tsakelaka ku ndzi vavisa, va kanela swa ku ndzi lovisa, siku hinkwaro va vulavula swo kanganyisa.

¹³ Mina ndzi fana ni munhu wo fa tindleve, a ndzi twi nchumu, ndzi fana ni mbheveve, a ndzi vulavuli.

¹⁴ Hakunene ndzi fana ni munhu loyi a nga ha twiki nchumu, loyi a nga ha hlamulaniki na van'wana.

¹⁵ Kambe we HOSI, ndzi ta langutela wena, hi wena u nga ta hlamula, we Xikwembu N'wini wanga.

¹⁶ Xikhongelo xa mina hi lexi: “U nga pfumeli leswaku lava va tikurisaka va tsakisiwa hi ku khuguka ka mina.”

¹⁷ Sweswi ndzi le kusuhi ni ku wa, ni switlhavi swa mina swa nyanya.

¹⁸ A ndzi fihli ku homboloka ka mina, ndzi tivona nandzu hikwalaho ka swidyoho swa mina.

¹⁹ Valala va mina va tsakile swinene, va ni matimba; lava va ndzi vengaka mahala, va tele.

²⁰ Lava va ndzi tlheriselaka leswinene hi leswo biha, va lwa na mina, hikuva ndzi tsakela ku endla leswo saseka.

²¹ U nga ndzi fularheli we HOSI, we Xikwembu xanga, u nga vi kule na mina.

²² Hatlisa u ndzi lamulela we N'wini wanga, muponisi wa mina.