Pisalema 37 - BIBELE Mahungu Lamanene

Lavo homboloka a va hlayisekanga

Pisalema ya Davhida.

¹ U nga tshuki u tipandzisa nhloko hikwalaho ka vanhu lavo homboloka; vadyohi, u nga tshuki u va vondzoka!

² Va ta hatla va oma kukota byanyi, va vuna ku fana ni swimilana swa rihlaza.

³ Wena tshemba HOSI, u endla leswinene, kutani u ta tshamiseka etikweni, u nga chavisiwi hi nchumu.

⁴ Tsakela HOSI Xikwembu, kutani xona xi ta ku nyika leswi mbilu ya wena yi swi navelaka.

⁵ Andlala makungu ya wena emahlweni ka HOSI Xikwembu, xi tshembe, kutani xona xi ta tirha.

⁶ Xi ta ku khanisa, xi vangamisa ku lulama ka wena ku fana ni dyambu ninhlekanhi.

⁷ Loko u ri emahlweni ka HOSI Xikwembu, miyela u langutela xona; lava humelelaka etindleleni ta vona, kumbe lava endlaka makungu layo biha, u nga tipandzisi nhloko hi vona.

⁸ Tshika ku hlundzuka, u fularhela vukari, u nga tipandzisi nhloko, hikuva swi vanga leswo biha ntsena.

⁹ Lavo homboloka va ta herisiwa, kasi lava tshembaka HOSI va ta kuma tiko, va ri teka ri va ra vona.

¹⁰ Ku nga ri khale, lavo homboloka va ta nyamalala, u ta va lava endhawini ya vona, kambe u nge va kumi.

¹¹ Kambe lava titsongahataka va ta kuma tiko ra vona, va ta dya mihandzu ya rona leyo tala va tiphina.

¹² Lowo homboloka ú boha makungu yo lwa ni lowo lulama, a n'wi mpfhumpfhela,

¹³ kambe N'wini wa hinkwaswo ú hleka lavo homboloka, hikuva wa swi vona leswaku siku ra ku avanyisiwa ka vona ri le kusuhi.

¹⁴ Lavo homboloka va hloma matlhari va konga ni vurha, va lava ku herisa swisiwana ni lava pfumalaka, va ringeta ku dlaya lava lulameke;

¹⁵ kambe matlhari ya vona ma ta tlhava vona vinyi, vurha bya vona byi ta tshoveleriwa.

¹⁶ Leswitsanana leswi munhu wo lulama a nga na swona, swi tlula rifuwo ra vanhu vo tala lavo homboloka;

¹⁷ matimba ya vona ma ta herisiwa, kambe vanhu lavo lulama, HOSI Xikwembu xa va biyelela.

¹⁸ Masiku hinkwawo HOSI Xikwembu xi tikarhatela lava nga riki na xisandzu; ndzhaka ya vona yi ta va kona hilaha ku nga heriki.

¹⁹ Enkarhini lowo tika va nge nyumisiwi, va ta dya va xurha hambiloko dyandza ri ri kona;

²⁰ kambe lavo homboloka va nge poni, valala va HOSI Xikwembu va ta vuna kukota swiluva swa le nhoveni, va ta tshwa va hela, va nyamalala.

²¹ Munhu wo homboloka ú tsakela ku lomba swa van'wana, kambe a nga swi tlherisi; kasi lowo lulama ú twela vanhu vusiwana, wa hanana.

²² Hakunene, vanhu lava Xikwembu xi va katekisaka, va ta nyikiwa tiko ri va ra vona, kambe lava xi va rhuketelaka, va ta humesiwa eka rona.

²³ Munhu loyi HOSI Xikwembu xi tsakelaka mahanyelo ya yena, ú nyikiwa hi xona ku famba a nga chavi nchumu.

²⁴ Loko o tshuka a wile, a nge etleleli makumu, HOSI Xikwembu xi ta n'wi khoma hi voko, xi n'wi pfuxa.

²⁵ Ndzi vile jaha, sweswi ndzi dyuharile, kambe a ndzi si vona Xikwembu xi tshika munhu wo lulama; hambi va ri vana va yena a ndzi si va vona va kongomela swakudya.

²⁶ Minkarhi hinkwayo ú twela van'wana vusiwana, a va lomba swa yena, ni vana va yena va kateka.

²⁷ Loko mi endla leswinene mi fularhela leswo biha, mi ta tshamiseka minkarhi hinkwayo,

²⁸ hikuva HOSI Xikwembu xi tsakela leswo lulama, lava va xi khongelaka, a xi nga va tshiki empfhukeni, xi ta va hlayisa hilaha ku nga heriki; kambe vana va lavo homboloka vona va ta heriseriwa makumu.

²⁹ Lavo lulama va ta nyikiwa tiko ri va ra vona, va ta tshama eka rona hilaha ku nga heriki.

³⁰ Nomo wa munhu wo lulama wu humesa swa vutlhari, ririmi ra yena ri vulavula leswi lulameke.

³¹ Ú hlayisa nawu wa Xikwembu xa yena embilwini ya yena; loko a famba, a nga khuguli hi nchumu.

³² Munhu wo homboloka ú xiyaxiya lowo lulama, a lava ndlela ya ku n'wi dlaya;

³³ kambe HOSI Xikwembu xi nge pfumeli leswaku lowo lulama a hluriwa hi lowo homboloka; hambiloko lowo lulama a nga tisiwa ehubyeni, Xikwembu xi ta n'wi biyelela.

³⁴ Tshemba HOSI Xikwembu, u famba endleleni ya xona, xi ta ku tlakusa xi ku nyika tiko, kutani u ta hlalela ku herisiwa ka lavo homboloka.

³⁵ Ndzi vonile munhu wo homboloka, wo chavisa: A a navile ku fana ni murhi wa matluka ya rihlaza.

³⁶ Kuteloko ndzi tlhela ndzi hundza ha kona, a ndza ha n'wi kumanga; ndzi lavile hinkwako, kambe a a nyamalarile.

³⁷ Xiyaxiya lava nga riki na xisandzu, u languta lava lulameke, u ta vona leswaku lava tisaka ku rhula, va ni vatukulu.

³⁸ Kambe lava tiarisaka va ta herisiwa, vatukulu va lavo homboloka a va nga ha vi kona.

³⁹ Vanhu vo lulama va ponisiwa hi HOSI Xikwembu, hi xona khokholo ra vona enkarhini wa khombo.

⁴⁰ HOSI Xikwembu xa va pfuna ni ku va kutsula, xi va lamulela eka lavo homboloka, xi va ponisa; lavo lulama va sirheleriwa hi xona.